星期一見營養師

從此...四個月既戒口...時間就開始了！

加油呀！

又出POST

剛剛收到個留言...叫我持續出POST..

雖然位人兄我好似唔多識..
不過...都為左佢出一出POST啦！

報告近況︰
渣打馬拉松仲未開始練....死得！

渣打馬拉松

各位朋友...

我鄭重宣佈...一向唔做運動既我...

報左十公里渣打馬拉松...但我都仲未開始練....

尋求...男性增肥法

本來增肥係我既強項，我只係想減肥..

拍拖以來...係咁肥...激鬼死人..

不過今日既重點係..自從男友傷左腳之後，又戒口又做唔到運動..

佢依家得返百一磅唔夠...點算呀...救命！

聖誕禮物..

我依家織緊一條好短既頸巾呀...哈哈哈！

結婚的苦惱

可能年紀愈大，身邊既朋友開始結婚，生仔…

所以近半日所忙既，都係幫人地準備結婚既野..

大耐冇寫，其中一個原因係...因為所有事情都太複雜！

之前二個朋友結婚，新娘，姐妹都攪出很多不愉快事件，

好喇！到佢地終於結左婚，可以鬆一口氣！

依家又輪到阿妹結婚了！

譚家第一次嫁女，其實冇我想像咁風光咁好！

我只可以怪我依個大女唔爭氣，嫁唔出之餘又冇錢幫佢地做得好好睇睇！

理論上，錢解決到既問題跟本唔係問題(敗家的想法)，

但冇錢既話...所有問題，追根究底...咪又係還原最基本 - 錢問題！

見到阿妹為錢而咁張羅，其實我好心痛！

不過我冇中六合彩，所以...好難幫到佢...

而且自己又大使，餐搵餐食餐餐清(但又唔死得架喎！呵呵呵)

不過，其實對我來說，婚禮既準備，煩但係幾好玩既！

未結婚既我已經要諗定化妝，攪RUNDOWN，整依樣個樣...好在..份工得閒0者!!!~

港女事件簿 的反思

相信近日有留意新聞，討論區既人，都知道港女XXX大鬧元朗聯X行事件。

當中，憑我片面既推測，
我唔係太可憐個女主角，
即使佢已經慘到俾網民起晒底，
由幼稚園相至到大學相，屋企地址，無人幸免。

點解我咁冷血，其實…我覺得無論點都好！
佢既態度真係好差好差，而且心地又唔好！
有D野唔係諗住放係網就大晒，何況係佢自己無理先！
係我都最多係係MSN同FACEBOOK寫篇文唱衰佢算...唔會拍片....
攪到咁大....真係好難收科..

正如奧巴馬都有話唔好亂放野上FACEBOOK啦！
但不過，又有好多人鐘意放自己D相上網...
(不過依又真係方便咁同人分享既....好似D結婚相咁！平時好少可以睇得盡架嘛！)

既然係咁...我今日都嘗試係YAHOO打返自己個名，
哈！都搵到少量自己既野....例如︰起碼就搵到依個BLOG~

你話做生意就梗係易搵人人識你....
私人野就好似咪攪好D....因為..依個世界將來會變成點...真係冇人知...

卡啦OK

知幾時先買到套卡拉OK 軟件呢？

依家睇亞洲星光大道 同 超級巨聲多，
個個星期日都係一路睇一路唱，
一路唱同男友一路笑，
攪埋D 爛GAG歌詞！

二個白痴友係咁玩，
好想好想屋企有得唱卡拉OK，有二支咪嘈爆佢！
YEAH~~~~

你不在...當我最需要愛..但你不在...ARRRRRRRRRR

劉翔加油 之 後話

咁同男友講下講下...

劉翔除左起步個下係慢左D之外，中途個後勁係非常之勁！
快到佢丫！
如果唔係爭開步個少少，真係贏左啦！

(不過起初試成績，贏左自己已經萬分開心架喇！)

咁講講下…男友就話自己腳傷前都跑得好快！
我就話喇！雖然我唔係咁跑得，但我試過跑得好快！快到自己都驚呀！
男友聽完即刻爆笑，有幾驚呀！
我話︰唔好講笑，對腳真係跑到不受控制，上身追唔到下身對腳，又收唔切掣喎！勁驚！
男友又再狂笑一輪就話係咪咁真係勁呀！


P.S 雖然我冇睇過男友跑，但見佢打波，身手真係好靈活架！

劉翔加油！

昨天電視播左劉翔傷癒後第一次出賽！

大家心情都好緊張咁睇比賽！

男友因為打波而令半月板裂左，十字韌帶斷左，岩岩做完手術！
洗完一大筆手術費..仲要開始勤練力，操返D肌肉，又要按摩同敷冰…
一大堆手尾…所以非常感同身受咁！

我男友睇完之後，雙眼發光問..."點解劉翔跑得咁快架！咁快好返既？幾時到我呀？"

我話︰"13個月之後！"
望見男友目光由興奮變左呆滯，希望佢俾D時間…好快會好返既！

加油呀！

Habitat for Humanity @ China

2009/11/15-20

Be part of the World's Largest Volunteer Building Campaign

the 26th Jimmy & Rosalynn Carter Work Project 2009

Let's BUILD together!!~

To register, please visit www.habitatchina.org
Hotline: (852) 2520 4000
Fax : (852) 2520 4020
E-mail : volunteer@habitatchina.org

大家有興趣都歡迎參加！
其實我都好想參加架！不過佢要捐HK$10,000咁我就唔夠錢..
我諗我身邊既人都唔會捐到俾我...一_一"
但我都會支持大家參加架！

對不起..很久沒打BLOG

自從上次睇完LAUGHING GOR之後心諗話要打一定要打之後...

點知都一直冇打到...
近來忙開學..忙睇下報紙...忙得罪人...

一代不如一代

岩岩睇完其他BLOGGER既BLOG，講起放榜，
我又諗起較早前新生入學既情況，真係....

話說好多YEAR 1既新生想問有關資助，延期交學費…
原來有好多都係阿媽代打電話，陪註冊！

嘩！幾大呀！仲要阿媽陪！
有家長問完申請資助，仲同D FORM係咪上堂班主任派！
我未讀過大學都O晒咀！

原來咁都唔出奇，讀RESEARCH既POSTGRADUATE學生..都係叫阿媽咩都唔知走去打電話問野咋..

買樓 VS 結婚

男友說...想買樓先！
但要等樓價跌，跟住再做積蓄去買樓...

用晒積蓄...咁即係冇錢啦！
咁就唔洗結婚啦！

雖然話結婚大有大搞細有細搞，
但點攪都要錢！冇錢就冇得傾…

我諗…我四十歲都唔知結唔結到LU！

有得結就仲要訓個個人係咪你想結！

好煩，希望我父母唔好怪我唔生性啦！

老闆早晨？

今朝睇AM730，睇到陳淑芳既增值芳程式，當中講到作為細既…有時返工放工LUNCH HOUR，可能都有機會係架LIFT到撞到D高層或超高層，芳姐就話叫大家唔好掛住聽耳機，又或者剩係講句早晨(或者講都唔講)，咁由得佢DEADAIR！可能介紹下自己係邊個，有返少少SMALL TALK。

我突然間諗…如果俾著我，介紹我識講，但如果老闆只係好寒暄咁咪我做成點呀？忙唔忙？
其實…我係咪要答返D客套但唔真實既說話！

第一二次見面，總冇可能講真話架！
「老細，我地部門簡直忙到PK啦！個個得閒死唔得閒病！」
「一D都做得唔開心，個FLOW都錯晒！」
「有好多困難呀！不過大家努力中！」

老實講，有邊個老闆會諗住聽依D老實講，比較負表但真實既都唔想聽啦！
最希望聽既…可能係「幾好呀！多謝關心！」
講埋D咁冇建設性既野，SO BAD！

P.S. 我諗...一開始就嘈，老細實唔鐘意啦！要投訴？同老闆撞多幾百次，關係好D先講啦！

每日一杯紅棗杞子水

醫師話我唔夠血，成日食埋D生冷野…身體比較寒…
所以建議我飲紅棗杞子水。

但原來飲依D都好學問架！

身邊女仕們一聽到…有D都好有同感話︰係呀！我都每日一杯！
有些朋友更說︰紅棗仲要去核先得，唔係就好燥架喇！

之前中醫俾左2劇藥我話食完會暖D，
唔通又俾D燥野我飲，依家攪到狂爆瘡，心情仲暴燥左添！

咁真係要人手去核喇！

吸毒

我未吸過毒，我唔知吸毒有咩吸引…

雖然我也寂寞過，也被人排斥過，但幸好沒交損友，未吸過毒！

不過我都有少少既經歷！

曾幾何時，在網上交友，友人們為人也不錯的，
有幾次試過跟他/她的朋友見面，
可能大家的生活實在大不同，
我見過友人朋友在家吸毒，
也見過友人朋友在卡拉OK索野！
其實佢地就坐在我隔離！

可幸的是，友人都沒有邀請我，並替我綩拒友人朋友的"好意"！

不過我想講既係…其實政府宣傳我覺得好足夠！
只要你有睇電視…從學警出更至今，電視劇集，廣告，連近日一連串報導既新聞，報紙都大篇幅報導吸毒的禍害！
點解你仲唔愛錫你自己呢？

小器

之前咪忙緊一樣唔講既秘密…

最後終於衰左喇！個樣係咩…
其實咪讀書囉！

之前有新同事入職，大家講起讀書…
回想起，其實自己真係需要張大學沙紙先可以再上，
現任公司同政府工無異，計GRADE計人工，
冇沙紙就永遠只局限某一個薪酬水平，
不過勝在五日半，醫療福利叫做好，但就唔會似私人公司有雙糧有花紅！

咁既然講到興起…咁就報名，
佢又叫我INTERVIEW又WRITTEN TEST，
雖然都好耐冇讀過書，
但我都好認真，我睇晒佢D PROGRAMME DOC同準備面試！

點知結果都係失敗，
打去點PROGRAMME LEADER我衰咩！原來就係衰左個行既工作經驗唔夠其他人多！
唉！咁唯有輸得心服口服啦！
話雖下年可以再來，但個心已經未必咁勇啦！

經過不斷的禱告，唯有說…神都認為我跟DEGREE不適合吧！

無雙@ PSP

昨天係屋企打無雙(阿媽同阿妹就玩神來麻雀)，
由夜晚十一點幾打到接近二點！

打完妲己打第二關唔記得咩名，
第三關係呂布....超難打！
我用左劉備，張飛同關羽...二次都爭少少...
如果唔係因為第二朝要返工都唔訓覺住..><

不過隻手指公好痛.....(因為太肉緊，所以出盡力)

結婚 vs 離婚

係依個年紀，身邊有很多朋友都相繼結婚，
但睇完ck既結婚幾年，都有唔少相同既感受。

其實所謂既"自私"係咪真係咁自私呢？
二個人相處，唔多唔少都會有些變動，有些付出，
只是熱戀時你付出得開心d，以為有收成時得不到就說對方"自私"！

係相處既時間裡面，對對方的了解會增加，
更加想到…再生活落去是怎樣的一回事，
甚至…可以聯想到跟他生兒育女後，那個"八厭仔"有幾似佢阿爸，又有幾令人激死！

這些可預計到既事情，都令人不敢想像！

心急，似乎是為著高堂，好讓他們得個安心，
但…往後的日子是自己行的，怎樣才能覺得對方是可以付詫終身的人哩！
如果沒有這種感覺，以後的路…也不知怎樣走才好！

而沒有共同的目標，你叫我怎樣努力前進哩！

近期忙著的事...

HRO最近有一個英文寫作班(HRO可以俾我地依D GRADE參與既COURSE，多數都係爭磞頭)，
幸運地，我好快咁去報左名，更幸運地收左我，
依個11堂既英文班係BUSINESS WRITING，最尾仲要考個公開試添！
作為員工既我們，只要上足堂數同出席考試，就分文不需出。
(哈！好彩佢冇話唔合格要俾錢0者！呵呵呵！)

跟住本來諗住參加個話劇班，但人數不足會延期開班，
咁就由佢先啦！

接著就梗係得閒睇下有咩好工轉啦！
雖然人地要唔要我係一回事，但萬一有機會既話，就梗係要做足準備，
千其唔好好似上次咁大頭蝦，IN咩工都可以攪錯晒！

之後...就因為男友唔小心整親隻腳，
佢都要好小心咁照顧自己，我都要係咁易照顧下佢啦！
不過依家都照左知發生咩事，只係睇下應該點樣去處理同等佢康復！

仲有一樣，因為未事成，所以唔講住，
不過我都好想做足準備，因為係人生大事(唔係生仔結婚啦！)，
咁如果我成功固然好，仲要辛苦三四年，
萬一失敗，都叫對得起自己嘛！
不過，都希望成功啦！

爭扎

有人話︰過左三十歲，女人就已經太老了！
有人話︰三十歲以後，才是女人最有味道，人生精彩的開始！

計我話，如果係依一個年齡，仍然享受著單身固然不錯，
但找不到另一半的，是為什麼呢？真的享受獨身生活，還只是未遇到一個值得共渡餘生的對象罷了！

或許，曾經明示暗示過，但你那聰明的對象卻扮無知，
那一刻，是否感到沮喪呢？

要知道，二個人行的路是要雙方都有目標有共識的，
大家都玩過二人三足吧！

其實，係咪有需要諗下，點解對方未能對你作出承諾？
是因為習慣左一個人？對未來冇信心？
是因為有恐懼症？
還是更重要一點，為何對方未能把你放於重要的一欄，想跟你有未來呢？

愛一個人，不是很熱切期待著跟他/她的相處嗎？
很想快想和他/她一起嗎？

如果你不能令你的另一半對你有些期待，有些幻想，
可能…真係要自我檢討一下！

時間 Timing

時間是很重要的，

錯過的時間，就由它讓他們保持於二條平衡線上！

話劇班

岩岩報左名參加"戲劇演藝訓練班 – (初班)"
回想起小六既時候，我對話劇真係好有興趣呀！
係到自編自導自演…

不過由於往往都係三分鐘熱度同專注力不足既情情況下，
我都唔會為自己好專一咁參與該類型既學會，
所以至今做咩都依然係半桶水！

不過近排咁岩見到有依個課程(都唔平架！要成$1200-十堂架)
加上因為傷頸傷腰所以學唔到跳舞住，
咁轉行玩下其他，(我發覺自己好似D過度活躍症小童，咩都要攪，攪完一輪又冇晒下文，冇尾飛駝)
希望搵返D新鮮感！
難得老板男朋友肯做SPONSOR(依到千萬個多謝)
我盡量不負佢期望，如果最尾個堂有得表演，幾辛苦都班張飛俾佢啦！

不過大前提係︰我要放鬆自己，RELAX D，投入D！
人大左，面皮反而冇以前小朋友咁厚，咁膽大！
學跳舞時，我成日同自己講︰千其唔好同人比較！我俾左錢，企前D都好岩，
而且我要交代既係我自己，千其唔好同人比較！
但係有時…見到同班又後生又靚女既同學，
(頂！仲要個個身材好！最場至肥係我，仲要爭成條街，真係唔得佢地死！)
而且分分鐘我年紀最大，仲要大4-5年，真係咩自卑感到標晒上黎！

我諗到時我都要自我催眠下，
有好心人就開導下我啦！多謝多謝！

女人的終身事業(3)

女人除左身材外，樣貌皮膚都好緊要！

但靚樣，除左天生之外，質素都係一樣野！
要靚皮膚，真係對外對內，
要食得好，瞓得好，唔洗挨…最好重要做下FACIAL美下白，

係人都要用錢出去做，效果可能靚D而且更加心安理得！
但如果洗少D對我依D窮等人家更加好！

但一句話…又係唔懶得！
無論你要自製美容材料…都要分功夫準備！
要美白，要防晒！要做好多功夫....

所以如果你想你身邊的女孩子美麗，而佢又肯出少少力，
就應該支持下佢喇！
因為唔係人人都天生麗質架！

女人的終身事業(2)

係拍拖之後，生活習慣唔同左…
二個人相處，有開心有唔開心既地方…

而令我最感到苦惱既，就係大家既飲食習慣唔同︰
我男友係一個偏瘦既男孩子，較早前係就係肥左，
但肥左都仲只不過係28吋腰，160高少少..

而我…本身已經唔夠得個157CM 高,好似五呎一二左右<-究竟係咪用CM呢？我唔記得左
本身都話叫做同佢差唔多重，但係BMI來說，都已經過左適中架喇！
但經過一年既變遷，依家既RESULT竟然係屬於: 情況緊急, URGENT!! URGENT!!
真係唔得佢死~

男友既生活習慣係..多飯少餸，食零食，飲可樂！雖然佢時常食埋D垃雜野！
但其實又少食多餐，仲要食極都唔肥！
而我…多餸少飯架！零食已經唔同佢咁食，而汽水都少飲架！
但唔知點解，竟然可以一年內重左十幾磅！
面對身邊人既指點，其實我真係好唔開心！

唔開心既係︰自己唔爭氣唔做太多運動，又甚至做完運動食左少，但依然冇減磅既績象，
真係灰過灰姑娘!~

以前有段時間，我真係會食少好多野！
但依家…其實我都好想陪下佢家人食飯或者食早餐，
不過佢父母實行(多油多肉少菜)既原則，我怕我頂唔得太耐！
要知道，減肥餐真係要自閉咁食，對大人來說，一定唔贊成食咁少，
佢情願你做多D運動(但唔會理你做得幾咁辛苦)去減個幾餐大魚大肉，
但又會話你肥0嘟嘟喎！

另一樣唔開心既係︰
同男友及朋友去打波，
打完波，佢地例必即時去食飯，
我當佢地唔係次次都去鋸扒，都去食小菜啦！
佢地咁做唔係罪，但我發覺…我真係冇咩QUOTA再陪佢地咁食法，
我知道我男朋友好鐘意成班人去玩去食，
我咩都唔食好似好離群咁，甚至可能因為我…連佢都要離群埋一份！

但D肥膏肥就只係肥係我身上，都唔關人地事！
我次次同佢講，佢都話明白，但其實我知道佢都好左右為難！
雖然話...一係咁，都去食，但食少些或者再食清些，
咁喎…錢就要夾，食又食得少，咁樣好唔SO啫！
咁不如我自己走去行一陣自己再食喇！

蜜月期愈長 關係愈長久

今日睇完AM730,其中一篇報道話蜜月期愈長愈維繫關係。

經過調查顯示，戀愛次數愈多的人，係展開戀情時所能享有既蜜月期愈短。
而調查機構認為，想獲得天長地久的愛情，花點時間和心思，保持熱戀感覺是非常重要。

平時都有話…戀人們感情要保持歷久常新，可以保持新鮮感，
咁大家如果都可以保持在熱戀的狀態，咪可以成日都掛住對方，
欣賞對方既好，放對方係好重要既位置囉！

雖然明白平凡是福，但平凡唔代表平淡，
生活上偶然亦要製造一些生活情趣，使平淡的生活添上色彩，
令生活更有意義！

所以…請大家記住，
如果你地想關係再長久一點，唔好俾咁多藉口自己，
花多點心思去製造多一點生活情趣，
情趣不一定要用錢堆砌，但唔可以冇囉！

知道未呀？

女人的終生事業(1)

說到底…工作並不是一個女人的終身成就!~

要說道嫁左一個男人，搵到個好歸縮，有一頭家，咁係咪又係夠呢？

依個話題，忍唔住…終於要展開喇！

女為悅者己容，問世間，邊有人唔鐘意靚女，好樣好身材架！
但邊得樹又有咁多靚女靚身材丫…
雖然阿君如姐話…世界上冇醜女人，只有懶女人！
但成日咁做運動，扮靚…真係好辛苦架！
如果唔係…就唔會有咁多纖體公司話唔洗做運動，唔洗節食，
只要俾錢就攪得掂啦！

唉！要痛恨既只有痛恨自己少不更事，無知愚昧，
中學時期唔識節制，唔識扮靚保養唔識KEEP FIT，
每年重十磅仲以為自然發育，攪到知道發生咩事既時候已經賤肉橫生，
間接攪到情路崎嶇………(下刪數百萬字)

唉！要計起洗係依方面既支出，
我諗都夠我去日本同歐洲卦…可惜，攪咁耐都仲係一事無成！
真係要再諗諗去…

(其實係唔知打咩好…下次再傾)

正生事件

正生書院搬遷事件...真係想講好耐！

正生書院因為現今既學校地方唔夠，所以要搬去一個更加大既地方，
而政府選址為梅窩既南約區中學，
不過又受到大部分既梅窩居民基於唔想有吸毒人係梅窩同想自己D仔女係返梅窩讀書而反對，
而南約區中學校董又話自己好想繼續辦學，唔想攞間校舍俾人，
所以事件一直未解決，依家張文光話同正生校監傾下睇下梅窩接唔接受先讓正生在梅窩試辦三年，
之後再由梅窩居民討論正生仲有冇得留底。

昨天我同媽咪討論依件事，
她說︰梗係反對啦！人係自私架嘛！你有仔女都唔想啦！
我話︰咁又唔係喎！要吸毒，大埔馬鞍山…道道都有架啦！都唔可以因為咁而反對架！依家電視都好多教人唔好吸毒，學警都有教，D人唔聽都冇計架！

之後我又同細妹傾喎，結論係︰
如果D梅窩仔女住係梅窩，讀係梅窩，都幾自閉架喎！
俾你去到中五喇！會唔會連銅鑼灣都唔識去架！咩世面都未見過，好自閉喎！
如果連去巿區返學都唔得，都唔知仲有咩藉口出巿區行街去玩喇！

今日我再同公司同事傾︰
她說︰南約區中學殺校都係因為收生不足先被殺，咁即係冇人想係個到讀啦！
我話︰如果想當年中六收生得返梅窩，我都未必入去讀啦！咁遠！
她說︰根本就係選址既問題，如果個南約區中學校長走去搵咩外國大學，國內名校，都要有人肯山長水遠入去讀先得架！
我話︰咪係囉！冇人讀點都死，一係D梅窩居民想D仔女係梅窩讀，不如讀埋正生啦！近近地咁岩佢心水，反正大家都係讀書0者！
她說︰之前係舊址咁偏僻都係想D吸過毒既學生同出面與世隔絕下，係梅窩都好呀！係巿區返而近引誘啦！
我話︰都係架！係D近大自然地方，空氣好D，生活簡單D，人都唔會亂諗野啦！


經過多番討論，其實贊成正生搬入梅窩架！
係報紙見到D青少年，原來真係好後生，雖然我唔明白點解咁細個會吸毒(已經有代溝喇！)
但係如果有一個機會俾佢地，我覺得應該係支持架！
就係因為有人支持，更加係佢地改過自身既動力！
我會為佢地打氣加油架！

不過話是話，學生們真係要爭氣呀！萬一係三年裡面，其中一個同學做左D衰野影響左學校既聲譽，
其他同學既努力，可能就會被你地既錯誤扼殺。
到時，冇藉口話人地唔俾機會你！

希望大家都支持同俾機會那些真心悔改既人。

新郎結婚了.....

新郎結婚了....新娘當然不是我...

聽某人說過，不再想結婚，不希望有小孩。
但如果…是如果，他現在要結婚，怎麼辦？

其實也沒有怎麼辦，因為根本唔關我事，
分手以後我們也不是朋友，昔日既交情好比粉筆字已通通抹去，
我會懷念以往的'他'，但今天的'他'…我不認識！
除左表示祝福，其他的事實在幫不上半點忙！

慶幸他也不需要我的參與！當然，我也幸運的不需要參與！
我唔會羨慕人，亦唔會妒忌人！

令我開心既係，我好清楚自己唔會因為佢要結婚而唔開心，
亦唔會因為佢同另一個女仔而急於自己既婚姻，
婚姻不是人有我有，而是神聖而一生一世的事。
婚…唔係因為要結而結，而係你真係好想同個個人走埋下半生，
諗清諗楚先去做。

兩條線曾經係交叉過既，但最終行遠左...就係一件咁既事吧了.

記住︰唔會做d令自己後悔既事！

見工失敗

上星期…在公司附近見了一份工，
唔知係咪我本身知識少，俾人問到口啞啞，勁樣衰，
仲攪到之後d國語英文亂咁講，冇人聽得明，

我就是這樣，太緊張成唔到事，
不過我就覺得…天要我點，佢一定會好好安排條路俾我既！
下次再加油啦！

生活易

近日同事推介我看生活易的留言區，
看看婆媳關係專欄…
發現現今人都好煩下，婆媳糾紛糾纏不清…
但係來來去去都個樣野…
睇到悶聽到厭…

我身邊友人有些同奶奶(又稱99)關係一般，
更有些奶奶對她們不好，人事複雜，關係不討好！

我有幸未遇到依d事，(真的有幸嗎？)
不過，但願我沒有婆媳糾紛吧！

沙巴之旅

一連五日四夜之行程，都要男友跟朋友的沙巴之旅！

沙巴玩水，海天一色…上山下海，其實都不是我杯茶，
與其要洗四五千蚊，我選擇左留在香港！

本來我都為自己安排左節目，不過因友人家中有急事而放飛機，
只好令改行程，都係自自閉閉咁渡過，
星期五晚上陪左男友父母晚飯，星期六和朋友聽"中樂"團表演，
window shopping後同男友爸爸一起回家…
中途很掛念很掛念男友…於是打了通長途電話給他，
他又在訓教哩！沒有話多說，只是閒聊2句，聽到他的聲音以慰相思之苦！
在家中，一日自己做按摩，另一日自己做facial…聽聽音樂，無聊得很！
但總算在家陪下佢屋企人^^

小別勝新婚，在此中途，我也曾胡思亂想，
但係…我想下次都是要跟他在一起，(超痴身)，
現在又剛通完長途電話，的確，很掛念他！

((((我好掛住你呀！))))



在沙巴的你，可聽到嗎？ ^^

厚黑術

1. 裝老實
首先要做到唔出聲，再做到不爭。對上要盲從，對下要順從。對人要報從，不要出風頭，不要皺眉頭，不要嚼舌頭，待大家對你擁護又歡迎。

2. 裝正經
表面道貌岸然，品格高尚。私底下傷風敗俗，吃喝玩樂，無所不沾，無所不會。指責人時滔滔不絕，但自己卻有過之不無不及。

3. 裝糊塗
見了是非繞道走，是不關已不開口。不進言，不批評，不仵人心，不違人意。以不得罪人為前提，正所謂[能爬得上或保得住就是勝利]。

4. 裝寬容
面無妒嫉之色，內裡恨之入骨，表面一團和氣。言詞不露聲色，背後舉起把刀，骨子想斬你十碌八碌，見面仍關懷備至。[君子報仇，十年未晚。]

5. 裝昏庸
日日都想發財，但表面昏昏度日，咩都唔識，胸無大志，腹無良謀，不引人注意，不值一提，卻冷不防殺你一個措手不及。

6. 裝賢明
眼裡只有自己，心中只有個人。表面專上愛下，體貼關心，噓寒問暖，收買口碑。小恩小惠收買人心。推賢助功，舉賢任能。吃小虧佔大便宜。

7. 裝博學
不讀書，不鑽研學問，不熱心工作，沒有本事，但表面則無所不知，無所不會，令人望而生畏。

8. 裝勤力
人前跑得快，嗓子拉得大，表面好勤力，其實怕失去權力！

9. 裝忠誠
吃得苦中苦，方為人上人。

10. 裝笨拙
本來心機奸儉，偏扮呆笨及痴慢，收藏鋒芒，令人無從了解其野心，說話木獨，辦事笨手笨腳。實際暗日裹劍。

新同事

不知不覺，同新同事已經拍檔左近一個月，
依位同事年紀只係比我大一年，
學歷比我好，以往工作經驗亦比我多！
人工經濟更加豐盛，她經歷過少女幻想的婚禮，擁有一個半歲大的女兒…

有時在工作閒聊時，分享生仔既心得！很好笑！

依個拍檔十分醒目，是非分別（起碼識分我上司係個不負責任的人）
不過…相處一段日子，我覺得很一些地方很值得學習。
counter係一個唔討好既工作地方，我都有自己工作既要求，
然而，我們就要配合人(即使自己的方法work好多)
我倆既睇法一樣，但做方有少少唔同，
可能我依然係死牛一面頸(加上以往積怨太多)，攪到我自己都覺得自己極大既怨氣，
而佢…會學懂"你話點就點啦！"或者"敬老"..去令自己容易面對工作上既不便！

我想…太多的怨氣，真係令到自己好負能量，好唔開心，
唔開心…工作又點會做得好！

依樣，係我近期不斷反思同檢討的事！

今天在想...

想來一個大革新.....

令到我依個blog更加精彩！

財爺派糖....冇我份...

一直都唔得閒出POST，襯有D時間，數一數佢先！

之前財爺話抒解民困，推出一系列方案，
包括我冇份既豁免差餉，公屋屋租，
我又唔係學生，又冇申請綜緩…
而近年人工仲減少到冇資格填稅表，
我想問…佢又點抒解我既民困呀！ .\_/.

佢吹完水就算喇！
夠膽死俾人批評完綜緩出雙糧之後話"相信香港人都好贊成佢俾雙糧俾D綜緩人士"

我反對！

我唔係話綜緩冇窮人或者全部都係呃人，
只不過係…友人講得岩，我相信大部份低收入人士既月入人工絕對比佢地少，
我當你一個月綜緩萬二蚊，已經係人地二個月或者三個月既人工，
真正需要幫助既，咩唔係佢地咩，唔好話人地咁低收入，
就連我…都冇佢地咁高人工同冇雙糧花紅啦！
我都有一家大細要養！

而令我認為低收入人士最值得尊重既係…人地真係要付出呀！
大家都有家庭負擔，點解人地仲要咁辛苦去打工呢？
你估人地唔識咩都唔做攤大手板問人攞錢咩…

The Wizard of OZ

I love it!~

誠意推介俾你…同你既小朋友！~~~

The Neverending Story

http://www.youtube.com/watch?v=--ZTrKPFwJc

1984年出品
我的最愛

廣告一則

近日突然間發左神經，係到諗…我係咪應該讀返個degree呢？

雖然我知道自己唔係咩讀書既好材料，
但學士學位對現今人來說，卻是一張有用的沙紙！
我今時今日保得住依份工，我唔知他朝還可不可以…

我只係知道…如果我仲有命既話，
依張咁既證書…長遠來說，對我來講應該唔多唔少係有d用！

但依個對我依個不嬲冇計劃既人真係一個好大既投資，
我對自己，對未來生活，不安既指數係極高！


歡迎參觀Vanity Fair。

其實對一個夢想係賺錢買花戴既我來說，非不得意，真係唔想將興趣來謀生
(但現實係殘酷既…哈哈哈！)

懶過鬼

今朝睇到黃貽興係報章既一篇專欄，
內容係講美麗係要KEEP住既！

有好多男女都係係要吸引異性既時候特別花心機打扮，
而係得到手之後，就開始打回原形，咩佬樣醜態都出番晒來！
跟住就係...女為悅者己容，
其實要扮靚，應該持之已恆，而且扮靚唔應該為其他人，
係應該為左自己！

其實，我都好認同佢一番說話！
第一，人應該有自重感，一直咁倚賴人，為著他人而生存，感覺其實係好辛苦！
其次，自己打扮靚D，有自信D，人都開心D，個人自然發光發亮，吸引到人啦！

不過，我開始發覺....我真係懶過鬼，
MASK又唔定期敷，運動又冇恆心，
我諗…遲早冇人要架喇！
如果樣樣都咁懶散，真係人都灰多幾錢重，負能量劇增！

不過，我其實都好懷念以前有少少美麗而又自信既我，
她…何時才回來呢......

請指教

我見到CK同AK個BLOG裡面，係介紹人地個BLOG時，
個MOUSE指一指就可以看到人地BLOG既內容就知道有冇更新！

其實係點樣SET架呢？

有冇高人指點一下，謝謝！

六月沙巴旅行

男友跟他的哥哥，朋友們一起去沙巴玩！

雖然我由始至終都一口說我不會去，因為我不喜歡玩那些活動，
我沒有錢亂去旅行，要去就留回餘下的錢去自己心怡的地方吧！

不過，我還是會很想念他！

另一番風味..

上個星期五，開開心心的跟拍檔fairwell，
但是…明天起，就已經有一個新的拍檔！

這個新的拍檔，聽說她只大我一年，剛剛生了小寶寶，
考琴讀樂理的。
舊拍檔說跟她相處了一天，感覺她是很聰明，
(但由於我地係反上司派)
所以，不知道新同事企係邊一面，
由於我唔識睇人，所以我都唔方便同佢講咁多，
等識睇人既同事們幫手觀察下，再睇下點先！

其實，我真的不喜歡轉變，
無奈，命運就要我接受轉變，當中心情的起落，
上司當然認為自己沒責任安慰我，
老實講，我的確有些不開心，但我只是一個小員工，而且理應獨立，
沒有人有義務要照顧我心理上的需要！

其實我真的很想有人去安慰我，照顧我！

雖然，新人有新面貌，新方法，但對於未知的事情，總是戰戰兢兢的！

回到20歲

電左髮已經有年幾喇！

昨天忍唔住，又走左剪左長到心口既頭髮！
雖然個曲髮係好抵，電左成年都仲係好曲，不過最後都係把心一橫剪短左D，
依家....咪去到鎖骨到囉...

因為男友好似未見過我直頭髮，
所以特登叫師傅幫我拉一拉直，俾個短暫效果佢睇下！

結果，昨晚佢見到我第一句說話係︰"你個頭攪咩來呀！"
嚇得我心裡面以為自己好肉酸，唯有死撐︰"又係你話想見下我直頭髮既！"

跟住佢問我係咪係到扮後生，因為我個頭同想當年20歲個樣有八成幾九成似呀！
不過…就係因為拉直左，視覺個頭更加細，反而令到原本已經唔合比例既身形對比得更加強烈！

不過，洗完頭，直髮可能即刻曲返...攪到我都有D心思思買直髮器添！

然而，剪髮最主要原因，係因為我唔想一直引以為傲既"死人頭"愈來愈核突，同埋之前要除去之前電傷左既頭髮，正所謂，唔好既唔要，一要就要好既。反正頭髮長得快，剪完再留過啦！你話係咪先！(只係剪頭髮個價錢比較甘，稍為肉痛！)

今天很傷心

因為........收到上司發出既verbal warning！

激死我！我要快一步離開你！

生日日誌

2009.4.22

很久沒有於生日正日當天上班，
幸運的，老細們全部要出外開會，所以都冇咩員工冇咩學生，仲唔洗對住衰人老細，
又有好拍檔相伴，平平安安咁渡過辦公時間，
放工就走左去接男友放工，因為佢工作較忙，所以就一路打機一路等，
本來佢話想請我食法國大餐，但後來餐廳話冇晒位，想去太平館餐廳又鬼死咁貴又唔抵，
最後就去左食壽司喇！^^
因為聽日要返大陸旅行，所以行左一陣，男友就送我回家了！

2009.4.23

天未光，就要起床準備出門，
因為8點要係深圳集合去二日一夜之旅！
由於男友爸爸,媽媽都剛好係放假，所以就聯同男友跟他們一樣去旅行！
一大清早，大家就係上水火車站集合到深圳茶餐廳食早餐！
媽媽原來一早已悄悄食左三個男友買俾我既壽包，
之後就集合點名，嘩！全團人都有四十幾人，都幾多人喎！
尤於係平日既關係，團友多數都係上年紀，或者好多師奶！
我地首先去左中山食下野，跟住就去返到我鄉下台山既"康橋溫泉"到晚飯！
因為我地四個人，所以被分到一間別墅式既房屋，
地下係大廳，一樓同二樓都係睡房，我地仲用男友份生日禮物walkie talkie來玩添呀！
由於未到食飯時間，所以媽媽就叫我地一起行下，影下相，
晚飯過後就開始浸溫泉喇！依到有一百零八個溫泉，我地仲一起玩衝浪同滑梯添，媽媽真係勁攪笑！
玩完溫泉，爸爸仲買左煙花俾我地玩，好開心喲！
之後仲食左煎餃子同雞粥，正！
回到房間，因為浸完溫泉之後d睡意甚濃，所以睇睇下電視就已經去左會周公了！

2009.4.24
一清早，爸爸就用walkie talkie叫我地起身，
我地一行四人食過中式既自助早餐又去浸溫泉喇！
浸浸下既時候，見到有d人著住衫入來影相，咁男友就借d易攞埋部相機同我地拍返d溫泉相，
因為身材不好，但攝影技術又欠佳既情況底下，都係影多d爸爸，媽媽同男友好了！
不過，能夠係溫泉偷偷咁影相，因為別有一番風味！嘻嘻！
之後吃過午飯，我地就要坐返三個半多鐘車回程返深圳了！

雖然只係一個二日一夜既旅程，我都覺得好開心，
因為爸b，媽mi真係好好笑，我都好希望藉著今次既旅程，可以同男友既家人關係邁進多一步！

2009.4.25
今天是很期待的一天，因為約了我二位最好最好的朋友吃西班牙餐！
這間餐廳很久沒去了，很是懷念那個由紅酒加生果的西班牙特飲和蕃茄多士！正！
我地三對人，女孩子們就講結婚既野i尤於唔關我事，又插唔到咀)，
男孩子們就好想有點悶，唯有講下相機功能啦！
咁我地成晚都食左好多小食，一個飯一個意粉，仲有三個美味既甜品，當中既焦糖燉蛋，真係好正！
當晚都有幾多人生日，所以live band都唱左好多次生日歌，我梗係諗…唱咁多次，到我個時真係咪攪(不過見好耐都未去到我地枱)，
係食緊第一道甜品既時候，我掛住係咁分，點知冇啦啦係毫無心理準備既狀態下，
佢地竟然係第二首甜品上插上蠟燭，成班人仲唱生日歌，仲攪笑到叫男友起身送個birthday kiss俾我，
勁窩心之餘…仲有一點怕羞添！
當天晩上很盡興，我仲破例飲左2大杯酒添呀！
好多謝好友們的出席，我真係好開心可以同佢地過生日！

總結︰
收到公司同事既一張大型生日咭，可愛筆一支；
好友們既浪漫玫瑰蠟燭一座及既名貴靚筆一支；
而最豐富既就係男友男友送既禮物，包括我想要好耐既白色鋼帶錶一隻、roxy吊帶裙一條、生日咭一張、愉快旅程一個、最後還有一個粉紅色既鎖匙包<-佢話未配鎖匙喎！
我好多謝男友既付出，其實睇返佢做既野，諗深一層，其實好似好有意思，好似那個粉紅色既鎖匙包，其實當中既意義，對我來說…真係好重大！
不過呢…雖然意義重大，但佢從來都冇一句半句甜言蜜語，只係好平常咁唔當一回事，依然係機照打，覺照訓，飯照食…o晒咀！

2009.4.10 大嶼山,大佛, 大澳一天遊

係天氣晴朗的一天，
我,男友,妹妹同4位同事們一起展開有益身心既戶外活動。

一直以來，和同事都係去下食飯睇戲，真係好少一齊參加咁健康既活動！
去到東涌，等齊人…大家都唔係咁想坐朗屏360，一來貴啦，二來怕危險(嘻嘻)，
我地大家購買了任坐來回巴士門票，第一站先往大佛進發！

原來，去到大佛都已經成十二點幾，
原來，大佛真係好大座，
同事們先行上百幾級既樓梯，
而男友同妹妹就掛住影相，慢吞吞咁！
就係咁…又行又影....都攪左好耐，雖然唔係好多級，但行到上去，我都冇晒氣，就死咁濟！

由於龍友二人組掛住影，咁我就同D同事自己行，
真係好好彩，天陰陰又冇落雨，仲有涼風陣陣，不知幾爽！
我地入左大佛裡面，原來放在好多已故人事既相.....其實最多人放紀念品既係梅姐梅艷芳(咁都俾我見到明星)
很快地，我地就行晒成個大佛落山喇！

之後我地就出發去竹林心經，起初都唔知咩來，
去到先見到好多一支支既樹(竹)，上面寫上好多經文，
咁我地就行上山影下相，妹妹就畏高<-真冇用！
影過相我地就轉去大雄寶殿，因為同事們要去拜神，一個二個拿住好大支香，
之後我就就食下D素食同豆腐花！(原來我地係冇正識食LUNCH架！)
跟住我地就去昂平360既巿集喇！

去到巿集，梗係shopping啦！唔理好醜都睇左先！嘻嘻！
影過幾張相，發覺冇新聞講少人得咁可憐！
跟住就坐車去大澳喇！

去到大澳！同事a就帶我地周圍行，
又好多海味舖，有少林寺，仲有一個好靚既石灘俾我地影左一輯日落相！

最後一站，我地返番東涌去一間印度餐廳食晚飯，
其實個到d野都幾辣架！我地叫左飯呀！雞呀！羊呀！薄餅呀！
味道都唔錯！整餐晚飯都好開心！
不過其實中間有個段小插曲，就係…係去餐廳之前，
同事a拜託左男友攞左一個好多cream既天使蛋糕，
本來我都冇咁覺，不過見男友懶係神秘咁，愈睇愈可疑就發現左喇！
我好感激佢地既心心，但咁都未夠，好戲在後頭，
同事d攞左一張咭俾我，係一張好大好立體既生日咭，
佢話知道我鐘意整咭，特登搵一張我整唔到既咭送俾我，
眼淺既我係個一刻真係好開心，好感動！
因為…我冇諗過佢地會係個一刻同我慶祝，亦都估唔到佢地係事前會為我花咁多心思做咁多野！
那一刻，我真係好驚喜和感動，黃豆般大粒既眼淚湧晒出來！
我想講，我很多謝他們，多謝他們既心意！

好耐冇update個blog喇！

但係..我見到..仲有一個二個人睇我既blog，
就係因為咁…
我將我今個月既活動，完完全全咁話俾你地聽！
等你分享下我既喜悅啦！

best blogger~

意大利地震...

噢...我的天~

依一刻最深刻的是...
猶記得從前的情人很喜歡吃麵，尤其是意大利麵，
在從前看完陳南祿的書後...
很想很想和他一起到意大利吃心愛的意大利麵！

當然，意大利的風味，
它的人情，它的藝術，它的建築…使我嚮往！

反思..

做左咁耐野！

點解會做得唔開心，好似冇進步咁！
今日…我反思左一樣野！

我係某一間公司做reception，係，好多人都話reception係好重要！
但我就覺得我個位就最易俾人忽視(起碼我老細平時唔理，但有穫氣佢先懶係關心下)
而且，依個係交惡位，因為想執正d來做，做好易得罪人添！
更甚者，依個仲係一個死貓位，有咩野阿某某同事企係counter亂答一輪，必定係話counter錯！

依d同同事同上司既恩怨先唔講住，講左點樣檢查下自己，
(暫稱服務對象為客人，他們大多都係青年人...即係讀緊書既未來社會棟樑)
頭先有個客人問一些申請係咪剩係交申請表格,
我話你可以睇返上網個申請(因為佢張form都從上網dl),
客人話睇左冇講..我話"你咪跟指引做就ok..."
佢話"個到冇話要...但一般都要架喎..係咪你唔清楚咋"
跟住...我俾左個mon佢睇....話"人地要求咩咪照做就行了"...(我都唔明佢仲要質疑D咩)...

其實我有諗過....以上既態度好似好差咁...
D客人其實係咪只係想問D野放係邊...我地就要指埋,俾埋箱NO.佢地....
或者直接答佢地一D已經放晒出來既答案..."係..唔係..是..否"<-跟住答錯又話我地..
(因為我發覺唔直接答佢地佢地好似會黑面同我好似好唔helpful咁)
而佢地係咪唔再需要自己去用腦諗同觀察.呢......
係咪咁....我地做CS既先叫答到佢問題.....先做良好既CS呢...

(我問左都係從事服務行業既男友..佢答我"是…直接d好！佢問d野幾白痴都好，直接俾答案佢吧！"
咁樣...我試下直接d，唔難為佢地啦！

身體接觸

早上上班時往往都要擠於沙甸魚堆入面，
今天早了些少上班，情況更為嚴重！

平時迫，但都可以叫做睇下報紙！
但今日，迫到連報紙都唔方便睇，不過都仲好彩有歌聽！

依樣都唔係一個問題，問題係…
發覺身邊前後左右的…都是一些男士..
可能係一D阿叔之輩，我唔係歧視佢地，
但我對佢地有時唔覺意或者唔小心掂到我，
我都覺得周身唔舒服！

我唔係覺得自己好巴閉，
只係我唔想誤會你...又唔想俾陌生人亂摸！

所以，男士們，請你們於迫車時，最後繞住隻手..或者雙手摸實欄杆吧！謝謝！

老友記

"真正的友誼大考驗，是在畢業後大家各奔前程，價值觀不停被衝擊挑戰之後。

真正的老友記是，不單與你一起成長，更在這些衝擊後，在任何時空都了解明白我的人。"

輯錄自今天的AM730 - 陳靜雯BLOG

細閱著此段文字，我回想在我成長的日子裡，身邊究竟出現了多少個影響我的人？而至今，還剩多少個在我身邊呢？

先撇開家人不算，朋友，我想…能間中維繫的…可能有數個，
朋友唔需要成日見，可能一年一次，或者再耐少少，
有時我諗，見得咁少，其實好多大小事佢地都未必知，我每日既煩惱，都未必能同佢地分享。

所以變相好似每一階段既好朋友就會好似係個排同公司既同事，同學校既同學，總知要成日見，
將自己每日最UPDATE既資訊跟他們分享。

不過，在我心目中最親切但現在距離最遠的只有一個好朋友，
即使平時少了些接觸，或她身邊實在太多好友，但在我最傷心之處，最能感動我的…就只有她。

然而，令我感到遺憾的，是朋友都好想流水般，一批舊朋友疏遠，又來了一批新朋友，
重覆又重覆地發生。

然而，其實每個人在我心目中，都有不一定既份量，都使我生命上有漣漪和畫上色彩，
我的人生，多得有你們，謝謝！

我發覺...

自己好像愈來愈自閉了~

三月的慶祝活動

3月23日是男朋友的生日，
其實早於一個月前已經開始籌備，當中發生左唔少既意外，慶幸現在總算在開開心心的氣氛下渡過！

3月20日(星期五)
晚上開始第一個慶祝活動~
同姐姐仲有tracy去左灣仔食日本野，d甜蝦同三文魚都好好食呀！
我地仲影左d攪笑既相，
之後我發覺....原來..我依家都唔係好大食咋喎！XP
回到家，男友就陪家人竹戰了一會。

3月21日(星期六)
休息了一天，晚上男友約了舊同學打波，
而我就同舊同事慶祝生日，
去到成班人得我一個女仔(雖然佢地都未必當我係女仔)
去到冇野做...唯有不停咁食..食..食..
之後本來想走先架，但個同事話等埋一起，因為佢地玩緊啤牌"13隻"..好快玩完€~
跟住我咪話好悶喎..平時男友都會俾下我摸下牌丫..
勁開心既事來了...本來同事個組輸緊錢...係我既lucky手之下，最後唔輸仲羸左少少添呀！
(其實我只係負責將枱面d牌遞俾我同事玩~咁都叫左有份參與唔會悶丫~)

3月22日(星期日)
早上起床之後，吃過麥噹噹早餐就出發往中環坐船入南丫島喇！
由於同行既友人晨早出發左，所以我地2個人自己去~
咁去到都有邊行邊食~ 不過因為同行既人不同，所以同以前既感覺亦都不同。
依次行程同行友人都想睇下發電風車，痴線架！條路斜到丫, 行到痴晒線又出晒汗。
不過…最後上到去風景都好靚！
跟住落山就走左去食阿婆豆腐花....我仲發現我對腳怒俾蚊針....痕到我傻!~
好彩有個好心既嬸嬸俾藥膏我搽頂住檔咋！
黃昏，好開心咁可以食到男朋友想食既芝士焗龍蝦伊麵，事後因為d龍蝦新鮮食到佢咀朣....佢仲不知幾開心滿足！
晚上，因為佢話唔去酒吧既關係，我地就留左係間好靚既房裡面睇佢最鐘意既獎門人，
等到十二點先吹蠟蠋食芝士餅賀生日~ ^^ ~

3月23日(星期一)
本來諗住食過西式早餐，不過由於係星期一既關係，
好多特式餐廳已經冇開，咁樣又食唔到同影唔到相了。
吃過早餐係房影埋seaview風景之後就要還房了。
就咁樣，我地係榕樹灣往索沽灣出發喇！
沿途我地一路影相一路睇風景，二人攜手跨過山坡，
可幸的...個天氣濕濕地又唔太曬又唔太熱，所以都唔太辛苦，
整條路線都好快完成~ ^^ ~
因為我買左男友想要既walkie talkie做禮物，
所以我地都邊行邊玩！^^
幾經辛苦，我地終於到左索沽灣，原來都冇咩野睇...剩係得海鮮食~
咁我地食下零食，休息下就坐船返港喇！

因為夜晚男友要同成班朋友慶祝生日，本來我想去銅鑼灣買蛋糕，
不過佢又話要回家走一趟，之後又唔夠時間行，
唯有係屯門由佢選左佢鐘意既朱古力蛋糕~
晚上好多人(有成十六個呀！好多謝俾面出席既朋友們)，
我地叫左好多餸，今次實滿足到男友想食燒鵝既願望！
大家都影左好多相！我相信，那天他一定很開心了！

3月24日(星期二)
我們假期的最後一天，
早上跟他爸爸媽媽喝過茶，休休閒閒的睇碟(日本那套禮儀師真的很感人，很好看)
黃昏就出發到他朋友的生日派對，依個派對仲盛大，有廿幾人出席，
又有pizza，又有雞，仲有男友至愛的長腳蟹同朱古力蛋糕。

就係咁…一連串既慶祝活動就完滿結束~
我當然希望佢過得愉快~ 不過我諗佢應該已經好愉快了~ ^^ ~
至於我自己既感受....唔....佢開心就好了!~ ^^

不好既消息

近日接二連三發生不開心的消息，

男友的好朋友不幸離開，朋友肚裡個bb出世困難重重，
就連我家中…也有事，
爸爸的癌病復發(最近做了一次大手術，消除了壞細胞，現在情況尚算叫人安心)
妹妹最近入院，剛剛得知患了紅斑狼瘡症！(就來結婚攪d咁既野)

我知道…最辛苦的一定要媽媽，
她要照顧我家所有人…而爸爸自己身體不好，更要擔心妹妹的情況！

唉！希望快d諗到面對既方法，
既然壞消息已證實，開唔開心都要面對，
那麼…我們就要積極d尋求解決辦法！笑著地支持她們吧！

甘心替代你

不管天邊風已起 只想依依看著你
夜闌人靜會否仍可希冀
經得起憂傷與悲 只因心中有著你
路遙長夜記憶從不捨棄 長街的身影穿過風雨有傲氣
曾一起出走不怕闖進了絕地
如夢如煙 全像遊戲

彷彿天和地在挑選我跟你 如像我亦重遇了生死
難道只好淌淚心痛告別你
無法讓我此際替代你
（無法讓我 甘心 替代你)

~~~~~~~~~~~~~~~~~~~~~~~~~~~~~~~~~~~~~~~~~
記得中學時代開始有古惑仔電影，
陳浩南(伊健)…山雞(小春)…真係好出名！
個時我都有追架！記得第一集既歌同內容都好好！

去到第三集，因為聽說浩南女友細細仔(黎姿)又失憶又跌落街又死！
依d死人蹋樓戲…我最怕架喇！
因為生離死別…雖然正常，但卻使我覺得好傷感！
唱k去唱依首歌，睇到d片段已經喊…如果…我入埋場，我真係會喊死！
就係因為依個個人情感既原因！
至今我仍未睇過第三集~~

昨天和朋友唱k個時又聽到，
歌詞，旋律，劇情真係好感人！
我又再一次忍唔住熱淚盈洭…眼濕濕…
好彩，身邊d人察覺唔到！^^

你咪理, 我愛你, 死未? (喪愛甜心版)

此劇原著(英文版) 於96年起在美國外百老匯連續公演至今，由風車草劇團公演的全球首個授權中文版《你咪理，我愛你，死未？》更是三度公演均告爆滿！

原著英文歌詞句句一針見血，由王祖藍執筆之中文歌詞同樣鬼馬抵死，今次「喪愛甜心版」演出班底除了風車草劇團的梁祖堯、邵美君及湯駿業外，還特別邀請了at17的林二汶參與演出！導演乃Peter Jordan，並由張錦程擔任聯合導演，務求加愛情感覺，要入場人士感同身受，隨時喊餐飽，笑到夠！

網頁: www.windmillgrasstheatre.com

~~~~~~~~~~~~~~~~~~~~~~~~~~~~
雖然舞台劇好貴…但其實…我好鐘意睇架！

同現在的男朋友拍拖冇耐，我已經同佢睇過，
對上一次係係情人節，睇歐錦棠獨腳戲<死佬日記>
今次咁岩咪好彩又係"白色"情人節，不過今次個套係好幾個演員合演既，
我諗…佢應該未睇過依d卦！

依套劇三度公演，我估…應該會幾好笑既！
(上次男友都睇到笑騎騎！不過我就鐘意睇多人個d多d...睇下舞台，大型道具，音響，載歌載舞，不知幾正！)
而且內容有講五個故事，由少到老，應該都夠浪漫風趣卦！
男友唔浪漫的份…靠佢係依到偷師喇！哈哈哈！(有陰謀架！)

不過，點都好，總言之就係我想佢開心，佢開心就等如值，咁洗多少少錢又有咩所謂哩！

(有一句成語好似講咩千金去換紅顏一笑，一時唔記得左添！
不過…情況好似又調亂左，佢d難gag…真係聽到都唔想笑…呵呵呵呵！)

公司文化

經過今日"乃屎"事件…

其實，我公司有一個文化，
就係各家自掃門前雪，
不過話雖如此，但係我身處個section已經係最好了。
隔離section，不單止自己顧自己，仲有好強烈既階級觀念，
找依d低層，一定冇人理會。

希望打份工都只不過係希望開開心心，簡簡單單，
我份人好單純，冇咩機心，咩都表現出來，
可惜，依d就係容易"乃屎"既關鍵。

今日返partime去檢查房，發覺牆上既鐘壞左，
不過，有個同事同我講，算啦！由佢啦！
點解！因為出左聲冇人多謝你不特止，仲覺得你侵犯左佢。
依d…就係我身處既文化。

其實…我冇要求過要同同事做一家人，冇諗過可以做到朋友(但都好彩，都搵到幾個交心的)，
不過，我都希望有一個大家互相合作做好工作，唔洗等老細話，同學投訴先出聲。

我地試過發現一個輔導員既file入錯文件，本來我地都怕唔諗住出聲，
但良心又覺得冇理由見到錯都唔出聲由佢，
結果係點…咪就俾人話我地好偷睇學生既野…
其實…鬼得閒睇咩！而依d經驗，亦令我地對一些事情卻步既原因。

我拍檔遲d可能唔做喇！因為佢要去追尋自己既理想，
我好支持佢，希望佢成功！
但到時我可能得返一個人咋！

我唔知道自己可以點！
不過我依d性格，都好快俾人插死架喇！
最衰自己又唔抵得頸，懶係正義咁！

你叫我幫你做埋個份，唔係唔得！但你要知道咩係自己責任囉！
不過依到你幫佢做野，佢地唔會多謝你！久而久之，d野仲變左做你既差事，
你想唔做就係你唔岩，a字膊到丫！
我唔幫手，我咪唔helpful唔得人鐘意囉！
以往d人俾佢地蝦慣，我反抗，我咪態度差囉！
邊個係人邊個係鬼係後面講我…我真係唔識睇！

我知道其實對於其他人來說，我已經叫好好彩！
所以…我都唔會怨，因為做好自己，如果都仲要俾人入到！咁真係要狂檢討一下黑人憎之處！
(我知我依個新人真係好大膽，咁多個section既惡人，我全部都同佢地有過節！
當然部分係我有做得唔好…但大部分係佢地有問題…最後冇point嘈咪投訴我態度差囉！)
但聽過…由開始至今，做親counter既，唔會冇是非，d人仲怕左我添！
出頭仲俾人誤會，反正做好人都死…不如…哈哈哈！

都係做入面文職好，雖然多d野做，但起碼做返自己負責既野，唔關事可以唔理，
但counter就咩都要理，但冇一樣係我地負責，
人地program做得好唔關我地事，做得唔好，我地就有份俾人投訴！^0^！


p.s 雖然把口係咁衰，但我…認架！
由於我咁膚淺…多謝大家聽我呻下！

斤斤計較

我男友有一種優點…

他為求身邊既人開心…他不會斤斤計較，吃虧一點也沒所謂。

而我，

我的胸襟好像沒有他那麼大，我會計較在家中誰付出多些，誰做得多些，希望他知道我做了什麼。

我想…如果我能像他一樣，不求回報，
我想…我應該能開心一點！

攪手真難做

除左工事上既苦惱之外，其實近日有一件令到我好唔開心既事！

其實早一個月前，我已經開始籌備男朋友仔係三月尾既生日，
本身有諗過二人世界咁過，但壽星不是我，
我知道他一向喜歡成大班人慶祝，所以…我都是照著這個方向去安排活動！

不過，是次既活動安排可能真係唔係咁討好！
因為…我決定左去南丫島開開心心，簡簡單單咁玩一日。
雖然南丫島冇話有咩野行同玩，不過都叫有得食有得行下沙灘，影下相，
輕輕鬆鬆咁過返一日悠閒生活。
如果男友一心以為二個人去玩，點知去到撞到咁多識既人，夜晚仲同佢慶祝，我會諗他一定十分開心和難忘！

然而，d人唔係好buy囉，又話食海鮮唔抵，又話貴又話遠又話冇野玩，
總之反對之聲不絕。
但係我係想攪一個驚喜派對俾男朋友，佢朋友的方案全部都唔合乎我心中的要求。
唔知係我固執定係咩事，所以係地點既分歧，係令到大家好似唔係咁開心咁樣！

係受不不斷既打壓中，其實我係超級唔開心，
我只係想攪一個生日會吧！我需要既係大家既配合，而唔係唔達標既意見，
唱k，燒野食，踏單車…平時都玩開，俾d新意可以嗎？
可惜，這些意見多多的人，卻是我男朋友最緊張的人。
就算係我同朋友去緊街，都會為這件事煩擾著，要令朋友們為我解困。

然而事情發展並未完結，有一日，我朋友竟然同我講早於幾日前已經有條茂李已經爆響口，
我個刻嬲到丫…
我嬲既係…邊條賤人咁唔識做，仲要係我質問佢既時間仲要推卸責任；
我嬲既係…我自己既蠢…係我為左大家既意見，不停咁叫人去搵方法解決價錢，地點，食飯問題，諗爆腦終於有點眉目之際，我覺得自己好洩氣；
我嬲既係…我唔知不停咁反對我既人係因為事前知道左依家事先不停咁潑我冷水叫我放棄，叫我一定要同男友商量，我以為佢地唔明白之際，原來最唔明白實情個個係我…我先係最傻最蠢最白痴個個；
我嬲既係…一個二個話冇問題，轉個頭去我男友面前講依樣唔好個樣唔好！

我知道我安排不週，我都盡量去問朋友意見，希望滿足大家，
但事實上，我發覺真的很難去相處…很難去遷就…
我至憎d唔坦白既人…

我男友話我因為依家事嬲晒成村人，個個都係我仇人。
的而且確…我係好上心放不下，但我只不過…唔識面對一d咁對我既人…


.....我覺得...佢地冇專重過我！冇理到我感受。
我想…連我最親的人，他也未必知我有幾傷心！

是非園地

我做左依份工半年，話長唔長，話短唔短，
蜜月期的確有…但很快過左。

公司是非周圍都係，依到亦一樣，
唔夠出面多，但都唔少得去邊。

又或者我性格硬頸玩藝術家脾氣，所以行先死先！

話說…今朝早又俾人照肺了!~

大致內容係話︰
1.係個幾月前..有個同學來話中獎....佢同負責同事投訴我地counter有同事答佢"我係到十年都冇聽過話有獎中架"...咁矛頭直指我~
(咁我同上司講"我有印象...我仲幫同學問過幾個負責同事都唔知邊個跟...我係有叫同學小心俾人騙...但因為我地唔知邊個跟..我唔記得實際係邊個講...但只係有印象..但十年一定唔係我講...你話"半年"都可能係我0者…結論︰死貓一隻)
2.有同事同佢投訴counter唔helpful....態度差....叫我留意下自己d態度...就算要"拒絕"人都要....用d技巧咁(以往既flow係同事唔理三七廿一都把工作放係counter，叫人執手尾。又或者交待得唔好，記得最近個單恩怨..係有個同事自己明明返星期六...起初問要負責d咩..因為知道我拍檔返...即係闊佬懶理...有同事交帶都唔想理..我咪話"你返counter係應該知同負責,我拍檔幫手咋嘛"...邊得咁卸膊架)
3.有幾個point既...其中一個係我地話counter忙...上司話叫我地就算唔忙都唔好咁張揚msn..會招同事話柄~ 咁counter既工作同文職一向都唔同架啦！

其實...每個人都有佢要負責既野...我最睇唔過眼係d人自己又唔理..將個波交俾人...
(雖然有句說係...幫人做多d野...洩低d都冇所謂...都係自己學多d野)
我覺得洩底唔緊要..但起碼要分清楚d野其實係邊個做.....因為依到d人幫幫下手...就變相覺得老馮係你做.....唔做我地就錯~

我都明白到如果由態度講起，咁我都一定懶辭其究，因為人地唔理你發生咩事，
總之俾人覺得態度差就一定你死梗。
所以...我自己都要檢討一下。
但咁俾人嚇一嚇..我真係唔識再分咩係應該做，咩係應該哽，
總之....半年內，無論我有冇錯，咩內部投訴我都踩晒！死梗！

危機處理之 機場阿嬸

之前睇完依篇報導，都已經send左俾d朋友仔睇下。

估唔到今日睇到ck老闆講起，不如又再講2句啦！

事源就話那個女人跟家人誤點而坐不上飛機，於是係機場內大叫大瞓大發"啷黎"，
咁個國泰員工拍左短片，之後俾人放左上網，令到發神經者極度尷尬，
而國泰say sorry不特止，仲話要upgrade佢去商務客位。

咁樣…好多人都話好唔公平，點解d人自己唔守時，
係咪係到滋擾人，d公司都仲可以是非不分去助長佢地…

其實我都好唔明，雖然我明白一d危機既處理。
雖知道人地做錯，但都唔好講到咁明，
但事實上有d人瞓晒地都覺得冇問題，
佢地既腦袋，我地一般既正常人係永遠都唔會明白，
d導師永遠只會教…即係我地唔讓步，但都要俾佢地係依個"遭人拒絕"既途中感覺良好！

但我覺得.."面係人地俾，架係自己丟"...
你話下下等人評論…但究竟依家....仲有冇公義！(正能量減少中)

「交齊功課換食物」計劃

故名思義…依個計劃梗係講邊d同學肯交齊功課跟住可以換取食物！

依下有幾篇報導都係講佢既︰-
交功課換食物 婆婆捐3000 鮮魚行獲10多善長支持
http://hk.news.yahoo.com/article/090224/4/aukp.html

頑童為三餐交足功課 書中自有午餐肉 學校奇招改造學生
http://hk.news.yahoo.com/article/090223/4/atv9.html

師生家長盡心協力 譜寫「鮮魚行傳奇」
http://hk.news.yahoo.com/article/090223/4/atz2.html

故事主人翁是一名小二學生，入讀小一以來例必欠交功課，校方去年底推行交齊功課換食物計劃後，這名學生「突變」，準時交功課，每周換取食物回家，包括臘腸、午餐肉、白米等。原來這名學生家境清貧，一家五口，靠父親經營「收買佬」生意為生，在金融海嘯後，生意收入跌至每月約1萬元，扣除舖租及屋租後，餘下約2000元就是全家的生活費，遲交租、遲交電費更是司空見慣。金融海嘯前廢鐵售價每斤2元，上周急跌至每斤1角，收入大跌，生計開支更是捉襟見肘，每日只有20元買菜，以現時物價之貴，多數只能買些廉價魚、菜頭菜尾佐餐，該名學生憑着交齊功課，換取食物，為家人加餸。

um....
其實事情有二面，有d人就話"好丫！依個計劃好，令到d小朋友知道搵食艱難。起碼俾d動力佢地，為自己為家庭，何樂而不為呢？"咁就舉腳贊成，大力支持！
又有d人話"咁物質，小朋友會唔會覺得讀書只係為左搵食，跟本唔明真正既意義，而且，付出半斤都可能只收得八兩"咁而質疑依個計劃？

我每次睇到依段新聞都各有不同感受，不過最後既感受係︰

咩讀書交齊功課唔係學生既責任？

不過，此時此刻，對學生可能真係要用依d方法喇！

家常便飯

男友忙了一個星期多，所以…今天被安排為休息日。
可能我太不甘寂寞的關係。

所以今日決定玩煮飯仔。
好榮幸，佢媽咪又唔反對喎！嘻嘻！

買完餸之後就準備一切。
今日煮既餸如下︰
鹽焗雞奕，炒菜心，豉椒蒸排骨，乾瑤柱蒸水蛋，粟米魚肚湯。

不過，好可惜…因為個蒸水蛋一放上枱就俾人食左淡，
所以影唔到相…(灰)，又影唔到d餸菜既大合照！><

下次都可以再改進，"蒸水蛋"要再計岩d時間或者用個薄d既碟，因為個底老左d，但係d味就好夠喇！
而個"粟米魚肚湯"唔知係個湯有事定係d魚肚有事，味道酸酸怪怪的。><
而個"鹽焗雞奕"就獲得好評！^^

下次努力！

不過...今次要洗埋碗呀！

新娘愛鬥大

依套電影…其實本來都冇咩興趣想睇，
但我有個朋友想睇，咪一齊去睇下，順便見下面…

成套戲主要都係圍繞一對好朋友既友情，結婚，
甚至佢同佢地同另一半既相處，
講起結婚依一part，我事後同返男朋友傾，
佢話…係囉！如果係我，一定唔會咁緊張，咁大件事，
d女仔真係緊張到誇晒張，好在我冇睇！哈哈哈！

正所謂，男女大不同，就是這樣吧！
之後，講對好朋友因為要同一日結婚，然而大家都著重依個婚禮，
大家互不相讓，從而互相整估，傷害，
冷戰同掛念，直至最後和解。

和解那刻，我很是感動，
那時候，我心目中就想著一位朋友，
這個好朋友，現在…可能疏遠了！
我們的身分，地位，觀念…可能隨著周圍既人和事而變得不同，
好像沒有了從前那份單純的感覺！
但是，這一刻，我真的掛念她，
記掛她從是對我的付出，在我感情重創時，是誰支持我，
是誰開解我，雖然現在我們見面的時間少了。
我想…她還是我最重要的朋友！

書到用時方恨少

依家既我…處於退休狀態，
因為冇錢既關係…應該都未必會考個大學學位返來，
就算有錢…對我來說，十幾萬咁讀過大學，
我又怕我搵唔返…

然而，我依家想學既都係一d既興趣班，
好似國畫，跳舞，整下野食…
又或者有機會再學下油畫咁…
不過依d全部都好似對我事業冇咩幫助咁…

昨天，因為一些事情要幫人改編歌詞，
唉！我一時間想不出一些合適的詞，
點解咁架！我的中文水準下降到咁，
要字靚同有意思，真係好費神同需要時間，
可能，那些填詞人怎能都被催趕下交稿呢？
我連去洗手間搵靈感既時間都沒有！
不過…我都已經即刻偷偷咁參考人地一二篇既作品！

我想…除了在手作仔花工夫外，
的而且確，要開始睇多d中文課本喇！
唔好剩係睇日文買衫喇！(雖然都要學下人地點著衫同扮靚！)

原來，做一個有外在美同內在美既女仔…係咁煩架！

難挨的日子....總會過去的！

近日，身邊不段發生一些不幸的事，
男友的朋友因病離去，朋友在生仔方面有d意外…
所以…佢近這二個星期，都沒有多理會我！投訴也不獲接納！

即使…我倆的情人節也一樣。

我知道這個朋友對他來說十分重要，
所以我明白他希望最後的事也能為他付出，
作為背後的我…應當也要學懂體諒和支持。

昨天，我又突然覺得...有點孤單！
覺得他不理我，可以咁講"我總覺得他花左別人心思的事，從來不曾套用在我身上"
換言之"佢懂得花心思乙水人的"
不過...次次問佢佢都話唔識><

我知道他是一個有情有義的人，也是一個很重家庭的人，
理論上…應該是一個下半生很好的一個對象！
但有些時候，談戀愛…真的要這個平淡而安穩嗎？

有時，很渴望有有新鮮感，有熱戀的感覺，有驚喜和難忘的事，
但.....唔知係咪我唔知足.....

昨天友人說，你太倚賴了！別人仲點解緊張你呀？
而且…你有男朋友已經好好架喇！大把女仔想拍拖都冇呀！你仲嘈？
而且依家好男仔都好難搵啦！

唔…係咩？

我都知道我年紀已經漸大，唔夠後生既爭，
要青春冇青春，要錢冇錢，要身材冇身材，聽落都好似好大穫咁喎！

那是昨天的事…
今天早上，由於他差唔多完成了朋友的事，就多陪我談天了！
(其實佢仲有一大堆工作要忙)
我知道.....我很任性又唔獨立，
不過.....我只係想佢放多d專注力係我到，
全心全意咁對我，唔好把自己分埋俾其他人…

近況

朋友篇︰
朋友有事....盡最後一點綿力！
要把他的"正"能量擴散開去吧！

愛情篇︰
有一個不一樣的情人節！

事業篇︰
朋友找到自己的理想，工作上很徬徨。

p.s 現在一刻心情超不爽！

心太軟..

上星期六去朋友家拜年...
順便請教朋友整甜品，
原來..朱古力軟心朱古力都唔係咁難整...

唔知道，如果得返我一個既時候，
會唔會都係一樣成功呢？

不吐不快

話說昨天同一些中學同學聚會，
八個女孩子…其實都好開心呀！

可能我實在太低b喇！所以全晚都九唔八搭咁！
跟住就少不免俾人嘻嘻哈哈笑一餐啦！

可惜，我發覺自己既攪笑天份太低....
我剩係識做埋d白痴俾人笑，自己又唔識笑喎！

而當中，有2件事令到我唔係咁開心既係…
係無意間有一張好醜樣既相俾人影到，
叫左唔好post係facebook…最後都俾人放左…
其實我真係覺得好唔尊重呀！

(唉！本身都唔係靚架啦！仲放d咁醜樣既相出街，想嚇死人咩！)
係女仔都想放d靚相架喇....冇錯咩！
我覺得咁樣好唔尊重我！你話我小器都係咁話架喇！
我唔靚都唔洗你四圍講....(好明顯依家係火遮眼)

無何否認，facebook既發明係可以搵返晒失晒蹤既人，
但係…唉，總之條氣就好唔順啦！

其次係…可能我不嬲都係冇咩人理，冇咩人錫，
講多錯多，所以講野冇人信，
把鬼火，以後唔講…
(當然就依一點，男友已經叫我檢討下，點解講多錯多咁失禮，難怪人地唔信我！ 哼！.\_/.)


點解我學唔識佢d賴皮野..笑笑口串返人人地都唔嬲！失敗呀！

冇私穩....

上次我同事佢有個秘密blog專說私人野only，

點知....有次有個唔多fd既人同佢講，知道佢所有野…
原來係對方不知不覺咁search到佢個blog，攪到冇晒私穩..而要重新開過另一個。

今天我都有依個感覺，我想加密…
但又怕一向睇開既人冇得睇....
(基本上..我既熟客仔都係真人唔識個d，係到識既另計啦！)

不如捐封利是既錢俾年廿八個六家人啦！

今朝既報紙，有個專欄探訪完六家人....
的確好慘…

其實，年廿八個個都收工，因為醉酒駕駛咁就冇左六條人命…
的確…性命在天，但真係好無辜囉！

我唔知有冇blog友講過依單新聞，
但的而且確…係好令人傷心既一年事！

如果想知捐去邊個account...可以睇am730..李慧玲個個專欄！

恭喜發財

今日大年初二，係依到恭喜大家發大財，
最緊要係身體健康，大家平平安安！
身壯力健！財源廣進！工作順利，萬事如意！
等等等等......好多數之不盡既好說話！

今個新年，又係一個新開始，
對我來說，新既一年就遇上新既人和物！

除左我要祝福我和我的家人﹐
所以既blog友同朋友…我都要好好的祝福！

^^~~~新年進步~~~

千年渡行一朝喪

今日好唔開心…係返工3個月幾月耐第一次有唔想返工既感覺，
事源係咁既…

有個同學到左我地counter話約左個輔導員，
咁我俾佢填晒文件但搵唔到個輔導員，
不過我當其時搵唔到人就叫個同學坐一邊等陣…
跟住counter好多人我就唔記得左…
至到一小時後，個同學話咁耐都等唔到要上課要走喇！
我心諗︰"大穫！"但即刻打返俾個輔導員啦！
咁我都好老實講同學等左一段時間，但確實幾點到就唔太記得！
咁個輔導員就不停咁話我冇交帶，唔通知，話我冇可能搵唔到佢！
就算搵唔到都應該入去房找或者留紙條！
跟住出到counter又訓話，
同同學傾完2句再訓話，
之後我用左少少時間去洗手間調整情緒，
咁就俾佢入左上司房喇！(連我上司唔係佢下屬都feel到佢既不滿)

我明白到今次我因為做得唔好，
但我完全感受到對方既不負責任，把所有事都往我這裡推，
其實…我只不過係全個department最細個個。
大蝦細一d都唔好睇！

然而，我那位喜怒不形於色既上司話︰
"洩左..俾位個個輔導員入....佢實新仇舊恨一次過報"


今日，某d人地dept既file又唔見左，
都唔知點解又關我地事，
其實個問題都講過幾十次，係咁拖我地落水。
最後，我同我拍檔唯有再做多d野…去保障我地！

依d真係員工既悲哀，攪咁多野去保障自已，留返ｄ時間做ｄ有建設性既野仲好啦！

懶可愛

近月來…唔知點解都買左唔少扮靚既物品…

上至眼影…下次搽身cream都齊備…

昨天又有一新攪作，就係頭篩~~
其實我不嬲都唔攪依d野…不過上次睇完套台劇..
見到個女主角戴完又好似幾靚喎！
咁咪試下囉！
不過唔好笑我老套喎！

而且，敷mask個時又可以用…哈哈哈！
又俾個藉口自己買野扮靚！哈哈哈！

2009初 - 寒冬

近日天氣反常.........大部分時間都好凍。
而我只有一件比較厚d既褸同一件中褸，所以…都有諗住睇下羽絨或者絨褸！
不過睇到靚質地，價錢合理既又唔心水款，岩款既質地又差少少…
所以依然得個"吉"！

但我相同…如果挨得過這個冬天，挨得埋個新年…
夏天應該好快到，咁到時就有大排衫著…

不過，如果夏天好快到…而我又未really好！咁就真係麻煩喇！

p.s 我又唔見左一隻比較貴既耳環........灰爆！

校褸去左邊呢？

依篇野....本來想係上個星期寫...但一直冇時間，今日一定要補返先得！

上星期天氣凍到嘔，著住d借來的羽絨！
好大舊咁樣出街碌來碌去趕上班，
係條街到，我發現左一樣野！
原來依家d中學已經唔出校褸喇！
點解咁講…我係條街望左好耐…我竟然見到一個同學係有著校褸既！
你話一個二個唔著我就覺得佢地發熱貪靚0者！
但無論男女…全部都唔著…可能只係著住件冷外套，又或者著自己既褸！
咁樣推斷…應該就唔係個別既問題啦！

但係…究竟攪咩事會冇晒d校褸呢？
有冇人可以答到我！

(我已經脫節喇！oh my god！)

眼淺

上星期六…終於又完了男友一個心願，到戲院看「葉問」。

其實…甄子丹既電影，我覺得都有保證，
起碼打得好看！而且樣又幾靚仔…哈哈哈哈！

講返套戲先，無論影評同口碑都一致向好！
所以都好值得期待。

不過唔知係咪因為我不好"打鬥"，而且"怕痛"，加上"善惡分明"，
所以感覺往往異於常人。
電影裡面…林家楝有d害左甄子丹，但佢又會唔想佢有事而幫佢！
而個二個日本軍官，一個衰人一個半好人，衰個個恨不得快d殺左佢！
而當某一個師傅俾人打死之後，甄子丹好嬲d日本人，就話要出去同佢地打，
(當然話出去打既唔止佢一個，但又好忟d人不自量力，雖然個時憎日本人係好正常不過既中國人心情)

但我一開始睇，其實每一拳我都覺得好痛，雖然男主角好君子，
但我都覺得好痛咁款，打到中途有人死傷，
我已經忍唔住好傷心咁喊，d眼淚係咁標出來，
去到末段，為左唔打擾身邊人，已經要減到掩口，以防喊出聲，
簡直好似親歷現場一樣咁激烈！

之所以，我唔睇戰爭片就係咁解！