2008元宵後感

今天晚上，郭富城跟我一起過，很是快樂！
如果根據今晚的興奮度去計算痛苦(反比)，我是極度興奮的。
我不知道身邊的路人甲乙丙會否以為我吃了藥，
也不知道會否覺得我在嘈音滋擾他們，
但是如果以上行為可以減壓的話…可見得，我的壓力是如何的大！

我的位置只是三百元的票價，幸好對正台，他很多時都面向我方。算抵！
可惜是我的前方一堆人，右手邊一堆人，全是文靜一族，沒有棒棒聲，沒有呼叫聲，我更沒看見右邊的那對中年戀人有拍過掌！
可能他們也覺得我很煩厭，因為我用捧棒打到他們，我不知道是否打了他們很多下，他們才忍不住出聲叫住我，
但自始後我的動作收儉，也用背部對住他們。(超好彩是坐近路口位)
不過我想他們也可能有費錢買門票，我就饒了他們吧！
我不喜歡現時的棒棒，因為不足半場，棒棒的長度減半，變成老弱殘兵，有誰會幫手改良哩！
結果，餘下半場，我用我的掌聲代替，那對手，一刻也沒有停過，完場時也紅腫起來，但值得的！
更可喜是…最後的玩水那部分，終於可站起來鬆下筋骨了！

其實…我的心真的累透了，
這晚，我也想了很多…想我喜歡的，想我需要的，
對不起，我承認…我還未長大，我還未成熟，我需要的…是一個可以照顧到我的人。
我不需要你是一個很瘋狂的人，不用你跟我奪命狂呼，那些挑逗性行為，還是留給女孩子做吧！
但我希望…你能夠包容我的稚氣，體諒我的白痴，以及好好的寵愛我。
而我…會為你隱藏著我的功夫，在你需要的時候，好好的站出來保護你。
我從不是大難臨頭各自飛的那一類，這是我的承諾。
朋友跟我說過…你從不是弱者的那一類，就不要以那一種姿態出現，
我想…即使我現在有多弱也好，骨子裡，也始終藏著一點傲氣，透支到死亡一刻。

我在想…我真的希望你過得好，因為這樣，你的離開才有意義！
友人說︰就是你這種爛好人性格，過分善良，就苦了自己。

後記︰我沒想過，原來第100篇是這麼的感性真實的。

壞習慣

我有一個唔係咁好既壞習慣…真係成日都眼金金望住人。

我有個朋友跟我說，這是一個很不禮貌的行為…其實我知既…
雖然係眼金金…但我唔係啤住人地個種。

眼金金望住人有幾個狀況︰
一)隔離枱d野好好食或者好似好好食
我試過同朋友食飯，三個人食和民傾計食左三個鐘，
朋友話留意到我好不期然咁全晚望住隔離枱d野食，同我講，如果想食就叫啦！
我話唔洗，但佢地又發現我不停眼定定咁望實晒，真係失禮人喇！

二)見到好靚/特別既野…
靚野得人鐘意就梗架啦！唉！不過我又實在望得太過入神喇！
簡單就指今晚丫…做完gym吹頭喇！
見到隔離個女仔話靚又唔係好靚，但又覺得幾有品味喎！
眼見佢條吊帶短裙，個款真係型呀！不過我諗都唔係平野！
見到見白色tee都係westwood，成個logo係心口，d質料又ok喎，望少d都唔得啦！
加上個女仔d皮膚雖然唔係白裡透紅，但望落去都叫做有彈性，毛孔又好似好細咁喎！
就係咁…我吹個頭幾耐就望足幾耐！

走個時，我見個女仔都望住我，我又望住佢，但咩感覺都冇…(正常丫)
不過我諗…佢一定唔係覺得我有咩特別所以望住我…
而係佢心裡面一定係到諗緊…"你望夠未呀…望！"

馬拉松的小故事

今日係跑渣打馬拉松既大日子…我都有好多朋友參加…
慶幸其中二個朋友既時間比以往既快，應該去賀一賀啦！

頭先睇新聞...我係咁牛咁眼睇下有邊個識…可惜，d人跑得太快，我睇唔到呀！
剩係見到個bb係到跑…3條超攪笑既鯊魚…

不過有一段講有人跑完馬拉...即場跪地送花求婚，
個女主角驚訝得大叫留口水(kakka~)，
我真係覺得感動，忍唔住流左2滴眼淚。

結束十公里長跑，也結束十年的愛情長跑。攜手邁向新生活，幾咁開心哩！

我係到諗...下年我係咪要參加下呢！但…有冇短d架！我怕我跑唔郁喎！

搵工等如搵老公

雖然依份工返左半年左右，同事們個個都好好！
但之不過由於公司有d問題(其實間間公司都有唔同既問題存在)，
個個同事都唔係咁想做，做得唔係咁開心！
雖然我唔係因為咁受人影響，之不過，繼續做，好似同我入職時想既野唔同…

依家都有睇下有咩工好做，你話我冇要求，我又唔係，
你話太高要求，又好似自己唔係好配喎！
依d野都好過機緣巧合，同人唔同命…
當然，首先要睇下你自己咩條件先得架！

不過呢…你話對自己冇信心又係死喎！自己都睇唔起自己，人地點睇得起你呀！
所以呢…自我又有一番爭扎。

其實…目標已經有，但太長遠。都係應付左眼前先，哎呀！講到自己都唔知想講咩！
----------------

不過，見到一d工，咩都唔係好寫工作內容就諗到唔洗諗架喇！
都唔知做咩…
----------------

係咪好似唔貼題，其實唔係架，只不過係思緒太亂喇！聰明的你，實諗到既！

渣打馬拉松

明天就是跑渣打馬拉松的日子，
以我所知，有部分朋友都有參加，
聽講渣打員工都要參加…

今天晚上回家時坐火車見到下微微細雨…
恨不得馬上提醒你要小心…
一望…原來已經11:52pm，我諗…大家如果要跑既，都應該訓左卦！
而且…我記得易亦同我講過個句說話，我要堅守去忘記做多餘的事！
仲難為我放工去買埋既先返屋企(又洗錢…慘！)

返到屋企，沖完涼，隻右眼皮不停咁跳，
我真希望明天天氣好返d，唔好太凍凍親，最緊要安全！

尋90年5月6日出生的人

尋人啟事
------------
尋生於90年5月6日出生的男或女，
如認識此人，請轉告我吧！謝！

------------

唔洗驚！其實我唔係有咩居心，
我今日收到封利是，紙幣上的編號係FD900506。
其實，如果肥龍兄係90年5月6日出世，依張我一定送俾佢！

因為我自己成日都想收到一張紙幣係印住自己出生日期，
難得依張號碼又真係可以配合到現今世上既人的出生日期，
我估…都有人想好似我咁擁有一個自己出生日期既錢！

夠心思夠浪漫卦…哈哈哈！(你睇我幾咁無聊)

一人有一個故事

每一個人都有一個故事…無論係精彩，平淡，開心，還是傷心…都係一個故事。

我有…你都有。

我自問係一個失憶症患者，所以，很多時都藉著一些文字作記錄。
因為…除左一d令我好深刻的事…又或者一d勁無聊既事會留在我腦海內。

今天，我又看到一個別人的故事…
一個有笑有淚的故事…

然而，我喜愛的…是這個一個男生，親手打出一大篇文章。
文字…是一個扣人心弘的表達方式。
我欣賞男生寫作…大部生女生是感性的，所以不足為奇(我自己講咋)
你要粗心大意的男生拿起支筆，我覺得他們是花了很多心機的。

所以一直以來，我都喜歡收情書，收咭。
不要咭內容一句生日快樂就簽名，我會殺人架！
我次次一係唔寫，一係就作文！哈哈哈哈！

不過…都係算啦！人要變…幾多篇論文俾你都冇用！

新一年，新開始

恭喜發財！
係新既一年，祝大家新年進步，身體健康，萬事如意！

而大家既祝福，我貪心d，我受晒架！

新一年新開始，大家都要開心d！
儲多d錢，搵過份好工，令到自己開心d，人都靚d！

係依到…我要多謝一個朋友，多謝佢鼓勵我打俾前男友媽咪拜過年！
我希望…點都好…留返個好印象俾人！
起碼俾人知道…依個女仔好野來架喎！做唔到新抱真係可惜喇！
不過言語間聽到佢都關心我，其實都有d眼濕濕！

最後，由於今年天氣真係好凍，好唔想出街！

我仲要趕功課，大穫啦！

娛圈的艷照風波

近日這個熱門話題，相信很多人也知道及談論過…
由於太忙所以未能睇到其他人的觀感…不過我自己倒有一點看法。

公司很多同事都有看過這些相片，也談論真假，
昨天，我後面有高級既，問同事取這些相，話因為熱門，所以想俾佢d朋友睇！
老實講，我剩係睇過報紙登個d，當中更耐人尋味的全相我就真係冇睇，亦冇興趣睇。
佢地做緊咩，其實成年人都知架喇！用不用咁深究呢？

我︰點解要send俾朋友睇呀！有需要咩？
高︰咁熱門，大家應該要知下同睇下？
我︰要知就咁講咪得囉，要睇，報紙都有登，有冇必需一定要睇全張相呢？
高︰睇下有咩問題喎！
我︰你咁樣再俾人睇，同發放者有咩分別！仲要不停咁俾人知俾人睇？好唔尊重喎！
高︰咁你冇睇咩，你d朋友睇左你冇話佢咩！
我︰我冇睇，朋友睇左，喂，人有個d你都有，就算睇左咪算，無需要幫手發揚光大，將心比已丫！
高︰係你正直…


其實，點解要係人地傷口撒鹽，可能我比較感性，無論事情係真係假，
我都覺得無需咁高調，如果係你自己，你又會點呢？

我唔係好人，心地亦唔善良…這些只是對人對自己既專重！

和酒精玩遊戲

我知道很多人都會得閒落酒場飲返杯，識下朋友，溝下女，
不過對於在酒場之間的男女遊戲，確實不是我杯茶，
見到不少男女於場內...目的也是在覓得一晚的快慰，
我總覺得，對感情欠缺了一份尊重...而這是我不能所接受的。

見到男男女女都酒精的薰陶下，情緒越佔高漲，膽子也變得越來越大，
所以…攬攬錫錫，一些身體接觸往往處處皆見，完場後跟人走的也見怪不怪，
當中的遊戲玩法，我想沒有人會說出口吧！

話說回來…要成為這個遊戲的參加者應該不難，但必須要清楚遊戲規則。
玩遊行當然時尋求快樂，如果只是想藉著一滴酒精去換取一刻的慰藉，就要承擔得起那感情上的代價。

近月來，伴友人參與這些活動，人就是有所矛盾，口說不要，但行動上就往往背道而馳，
在這些場面，我感覺到我的身分彼為尷尬，男人，就一隻貓，魚在口邊又怎會輕易放過，
要跟他們角力，也需要當時人的協助，隨著當時人因酒精影響而飄移不定，很讓我感到為難，
有一點辦事不力的感覺，然而酒醉都有三分醒，每個人都應保護自己，知道自己做緊什麼，
唔希望因為一滴酒精而有所後悔，大家都係成年人，要好好照顧自己的。

或者，這只是我過於清醒！

那些要你在玩骰子時輸了要留電話給他或一定要你飲酒精飲品的人，
其實我彼討厭他們的，因為…我覺得玩樂啫，應該唔會有下文吧！

總在這裡

看到鐵鎚兄<<總在這裡>>這一文，很是喜歡！

明白到每個人背景不同，思想不同，相處不是一件容易的事。
每個人都總有成個小朋友，低b白痴既時刻，慶幸既…身邊依然有人肯陪住依個傻豬。

我很喜歡他一句︰"康小姐未必是最明白我的人，但她就總是在我身邊。"

一直以來，我是一個倚賴性極強的人，我知道我不是最好，身邊人好，但總有令人可包容的缺點。
可惜…他們總會扔下我一個離去。

沒有身邊人，怎麼辦，以前，我會找著好朋友陪伴我，
到年紀大了，身邊最要好的朋友也有她們獨立的生活，
總不能陪伴我那麼多，但我知道…我並不孤獨，因為我還是比很多人幸福。
如果每個朋友每三個月陪我一天，那麼，只要我交90個朋友，那麼我就忙得很，還要留返d時間俾自己同家人呢！

------------------------------------------------------------
大家知道寂寞跟孤獨的分別嗎？
我想寂寞自己可以去控制，令到自己工作好忙好忙，
但回想…這樣忙就可以令人生有意義？不是吧…
人總要成長的…深閨怨婦…一定不令人喜愛吧！人總要作有意義的事！


今天我們看到發人心省的文章，也是前人的文字，感動了二十年後的另一稞心靈。
所以，各位blogger，繼續努力吧！

容祖兒

二零零八年一月二十六日，晚上，雨

看了容祖兒的演唱會，
一直以來很喜歡她，因為她的聲音真的很動聽，
音域很闊，可以一下子高音，一下子低音。

她身材很瘦，有一條小蠻腰，跳舞又型又索，令我羨慕得很！

曾幾何時，聽過她公司一些不好的傳言，也聽過她背後的內幕交易，
但其實，那一些鮮為人知的事，我跟本不需要知，也不想要知，

無論當中真假都好，
我讚賞旳，是她當中付出的努力，
我知道一個人有背景，有支持，做野梗係方便得多…
但她本人付出的，一點兒也不要呃殺。

我看到的，是她的努力，有時偏心地想，唱到聲嘶力竭，沙都咁好聽既！

雖然她樣貌一點也不美，但…世上沒有醜的女子，只有懶惰的女子，不是嗎？

天堂與地獄

遊歷過地獄，最終也要上回天堂…

有一首歌，每一次聽都好開心，好喜歡，很振奮…
今天想跟大家分享…

作曲: C.Y. KONG
作詞: 黃偉文
編曲: C.Y. KONG
監製: STANLEY LEUNG

留心坐穩 戰機要開
發射會在 數十秒內
電話要關 但米高風要開
切勿過份按捺

射燈已開 喇叭已開
各就各位 你在我在
傳呼機要關 但你的心要開
請看著這大舞台

* 別心急我聲帶 已經一早唱開
這首歌快將似轟炸襲來 你就讓那擴音機扭開
去將全場(全城)也覆蓋

# 表演我(高聲唱)直到你另眼相看
將抑壓能量 在台上釋放
攻克這殿堂 乍露鋒芒
讓我今晚做女王
幾百萬闕歌 輪流上榜
記下一段段風光
不管以後誰 稱霸稱王
難及我今晚聲勢壯

程式已開 再不會改
炸藥已在 百步以內
牆壁炸開 地殼天花炸開
將宇宙變做舞台

Repeat * #

射燈燒了都不怕 張單我負責吧
喇叭燒了都不怕 讓我清唱助慶吧

Repeat #

不可教別人 過目不忘
仍然讓耳邊天清氣朗

估唔估到依首係咩歌呢？可能我以前學跳舞時，覺得自己跳得最靚最型都係依首，所以特別有好感！
可惜，太耐冇跳，骨頭都硬晒lu！

對不起

二零零八年一月二十六日，晚上看演唱會。
本來好好地，唱到一首歌，發覺有一隻手放在我個膞頭，並開始一下一下，關懷地安撫我。
就在這一刻，一行行眼淚不爭氣的流下來，她跟我說︰「看到你這樣，我很是心痛！」，說著，她也忍不住跟我流下淚來！
對不起，我不是想令你擔憂的，我不想掃興的，請原諒我。

歌詞如下︰ (作曲：徐繼宗，填詞：黃偉文，編曲：唐奕聰，監製：陳永明／舒文)
想不起　怎麼會病到不分好歹
連受苦都甜美
我每日捱著　不睬不理
但卻捱不死　又去癡纏你
難道終此一生
都要這麼　不可爭一口氣

＊很謙卑　只不過是我太過愛你
　連自尊都忘記
　跌到極麻木　只好相信
　又再爬得起　就會有轉機
　若我不懂憎你　如何離別你
　亦怕不會飛＊

＃由這一分鐘開始計起　春風秋雨間
　恨（限）我對你以半年時間　慢慢的心淡
　付清　賬單
　平靜的對你熱度退減

　一天一點傷心過　這一百數十晚
　大概也夠我　送我來回地獄又折返人間
　春天分手　秋天會習慣
　苦沖開了便淡＃
Repeat＊（＃）

（說甚麼再平反）
只怕被迫一起更礙眼
（往後這半年間）
只愛自己　雖說不太習慣
畢竟有限　就當　過關

角力

係現今香港社會，話冇壓力就呃人既…
但係咪真係咁大壓力呢，相信就人人唔同。
對於我依d凡事認真執著既個體，很小事都已經令我好苦惱了。

每天早上，公司都係專車係指定地點接送員工直返公司，
每朝有三班，當然，我永遠都乘坐第三班，
不用苦口婆心叫我出門口，即使我早些起身，不知不覺的出門口時間也是一樣。

第三班車於八時二十五分開出，如果滿坐，就早些開走，
有時八時二十分到場排隊，也會因太多人又冇位坐，
每朝早上，我都夾好於七時五十五分的火車開出，到沙田時約八時十七分，
然後就急步走去乘車站排隊，
唔知點解，有一二個同公司大樓的人同我一樣係沙田出火車，
有時我走得跑些，不知道他們是否有心跟我作死，永遠行得快過我，
好似我每天都覺得自己"行步路都慢過人"，每天早上都很氣憤。
有一個男孩子更令我生氣，我覺得佢跟本同我鬥快，
佢行得好好地，我腳短咪跑囉，點知佢又係到跑，有冇攪錯呀！

如是者，每朝早上這段路程，我都感到很吃力，連行去坐車排隊都要爭。
如果係咁，我遲早壓力太大神經失常了！

其實我真係好唔鐘意爭，但如果上唔到公司車，就要坐的士或者轉幾輪車加遲到先返到工。

又再一次證明，依個係弱肉強食既世界，適者先能夠生存！