手作仔既禮物

其實d人話手作仔多心思，哈哈哈，其實我有時都鐘意自己整下d小禮物架！

依家pending緊既禮物有…十字繡一份，同頸巾一條，

十字繡係我織俾我個好朋友，未知佢會做cusion定掛圖啦！
但係依份禮物其實係2年前開始整架喇！依家都岩岩整左一半到，
慢工之中，我都真係算慢架喇！
希望快d整完了左件心事啦！

頸巾一條，依一份係送俾男朋友仔既聖誕禮物，
係一條黑色有扭花既頸巾，
本來要求高高既我竟然早2日發現，
係一舊冷之前既圖案竟然錯左，
好彩錯左個部分影響唔到個圖案，如果唔係，就大穫喇！
要拆左去再織過！

筍工

話說入左來依家公司做，
連帶埋有一份partime，
之後覺得俾人調左去偏遠的地方工作，
有好有唔好啦！唔好就係遠同工作時間短，有時先得個幾二個鐘！
好既就係如果d人生生性性，基本上冇野好做！

個幾個鐘裡面只係standby同埋online睇劇！
就咁樣，"與敵同行"同"我的野蠻女友"日本版就咁俾我追完！

而且個時鬼影都冇隻，自由自在，
丫…仲有野唔好，就因為鬼影都冇隻，夜麻麻得返幾盏燈，
想嚇死我咩，所以過左8點後我都唔會去toliet架喇！
忍到放工啦！

打羽毛球日誌

話說大學既羽毛球場鬼死咁難book﹐
每次約好晒成班同事，都梗係book唔到場，
(都唔明點解咁多人會朝早8:30起身去搶住book)

咁好啦！星期四個日下午諗住睇下再下星期五(10/31)唔知有冇場先拉！
冇就唔好咁早起身返來book嘛，
點知俾我見到10/24有7:30-9:30有場喎！
咁咪試下睇下如果book會係點囉！
點知一試，佢竟然彈左個confirm既畫面，無啦啦做咩confirm呀！
我一心諗住佢會有個版面叫我double confirm先成事，
oh my god！因為係book場24小時之內，又冇得cancel，冇得退款！

跟住唯有周圍搵人去啦！
跟住都好彩，搵到4-5個人去！

不過最後，聽講d人好似病晒，得返2個人打2個鐘！...我真係對唔住個同事咯！

證實左喇！

昨晚九點幾返到屋企，起初，媽咪都唔係咁睬我，
後來講下劇情，終於肯認下我。

咁妹妹再同媽咪講有關生日飯，我就涼都唔沖住走去搭訕，
跟住講返d公司既"好"野，有咩小便宜攞到，
有咩可以益下佢地，咁樣又好似幾得到佢地歡心喎！

之後媽咪話"終於證實左爸爸既cancer返發左喇！"
所以爸爸其實依幾日好唔開心，
(但都見佢有講有笑咁)
同埋開始做電療喇！

咁樣…我諗都可以會做返d野！

報應

曾幾何時，我很喜歡我的家…
然而，我…已漸漸的變得對家沒有歸屬感，
接者，我的家庭觀念好像越來越變得薄弱…

依家…報應回來了，
媽咪又成日發埋D小姐脾氣唔睬我，
三個妹FD到打BAND有野玩又唔會預我。
咁樣，我更加冇歸屬感。

其實除左我少回家之外，溝通唔到都係一個問題，
大家既處事手法不同，她們永遠覺得自己個想法係最好！
正所謂道不同不相為謀，就這樣，我不喜歡跟她們溝通了！

又或者係我唔痴家，對依個家根本冇付出，
所以有咩好同唔好既，都唔會預我，
有時我會諗…咩唔係少D見，就愈會珍惜能見面既時間咩？
但又唔係喎！
我已經好似潑出去既水(甚至更差)

你會講︰鬼叫你RECORD花晒咩，要補救要付出好多，好難架喇！

我又會諗︰你要我改變晒依家既生活去迎合佢地，我唔會囉！
我都係大人，我都有自由同自主權卦…

就係咁樣，關係就膠著膠著…

08森美小儀舞台劇 - 小孖俠 閱後感

依一齣舞台劇內容係講一對小孖俠係合作期間，
有人自以為是，大家唔識體諒包容，
中間大家有不咬弦既地方，吵架一輪之後決定"拆伙"
到最後還是大家互相忍讓，了解對方的重要性而再次聯手打敗壞人。

然而，導演之一的森美亦藉著此舞台劇送俾佢既好拍檔"小儀"，
多謝佢一直以來的包容，縱使大家平時有不協調的地方，
亦可以互相支持，鼓勵，努力攜手合作下去。

故事都不錯，畢竟係人地用心之作。

今次要讚既一班綠葉既演員，有leo，細so，朱薰，迪偉，
當然最攪笑係leo同細so啦！
而依個show少不了的笑位也不少(我見我男朋友都因為低b而大笑)
而嘉賓方便，張敬軒，謝安琪同鄭融，
可能係尾場關係，演員都經常爆吐，
鄭融真係掛住笑，連台詞都講錯，不過依d攪笑show，
忘記對話講錯野可能仲令d觀眾覺得有趣同好笑，
當然，眾dj既轉數梗係快到無輪啦！

至於各位小演員努力演出亦應讚賞。

好喇！有讚就有彈…要彈既，唔好意思，係好嚴重！

首先，係場地問題，
今年係九龍灣國際展覽中心攪，
場地竟然係差唔多所有$320既門票平排，
係平排，邊有可能架！真係前面個個高少少都睇唔到，
然而，的而且確，係成齣舞台劇裡面，我係好少部份能夠見到真人，
全程都係睇一個唔多清楚既電視營幕，
如果係咁，我諗我唔需要買$320飛去睇電視，
以住係浸會，演藝，理工都未曾出現如此惡劣既安排，
我明白可能係想多d人可以睇到，但依個場地，我覺得負責人安排極為失當。

而且，係場內更可隨便飲食，頂！

其次，舞台燈光效果亦強差人意，
今年比以往多用了電腦投射效果，
但舞台上不停咁對住佈景版開燈，投射既影像真係唔多睇得到，
唔相信商台既燈光組會咁唔專業。

再者，今年既場刊節儉都省無可省，
唔計係咪因為要縮減成本冇晒之前咁精緻既包裝，
但再連簡單既節目內容，歌詞，人物角式介紹都欠奉，會唔會簡單過頭！

我相信依幾點絕對不是我吹毛求疵，而係專業。
其實以往睇左幾年森美小儀真係覺得拍案叫絕，但今年的確令人失望。
或者依d係管理層既安排，但希望強烈反映。

最後一提，今年既紀念品design真係好核突！

P.S 依上既內容，我已經SEND左EMAIL去商台同天比高反映意見，唔知會唔會有REPLY呢？

泰林開倉

話說話泰林好似係30號開倉，
男朋友話一起去買熨斗咯！

好丫！反正都需要買一個熨斗，襯佢開倉仲應該可以執平貨！

跟住我話，不如買埋個焗爐丫，反正可能會好平，
男友問要個焗爐做咩呀！我話我要整曲奇，我要焗蛋糕，我要整野食，
男友反對，因為他屋企人不喜歡，廚房冇位喇！
我咪話…咁放係房囉！
但最終提議遭到否決！(貶咀)

今朝同同事傾，同事話個焗爐都要好多位又多油煙架！
我話可以抺架嘛，而且依家咁平…同事都一笑置之。

跟住我話…不過冇左個焗爐，少左好多野玩架！(同事即笑說是！)

擔心

幾年前，我爸爸證實患上鼻咽癌，
得悉的數天內，他由一個吸煙的人馬上一根也不抽，
甚至即時結束公司既業務退休。(個時佢經營既排檔發生左一d事，損失)

幾過幾年既休養，
爸爸依家既退休生活都幾如意呀！
玩下股票(唔識玩又學人玩)，做下家務，學下按摩，
唔…

今天早上收到個消息，就係爸爸係覆診後，
醫生話佢既病情有機會復發，
媽咪叫我地唔好激佢。

當然，第一時間我梗係覺得自己冇激佢啦！

其實生老病死乃人之常情，
可能，就咁望落冇病冇痛既我，會比佢先行一步呢？
話唔埋，不過你話我唔擔心就係假，
但係除左陪佢多d，又或者俾佢見多d，其實我都冇咩可以做…

不過我知我係咁多個女之中最令佢擔心既一個。(仲要係大女添！)
我都知我冇用架喇！

回想起細個時同爸爸既點滴，都好值得懷念，
雖然大個女之後冇咁痴家，而最令佢生氣的都只係我。
可能異性相吸，反而我同爸爸既感情好過同媽咪(可能媽咪錫d妹多d)
諗下諗下都好感慨！

諗多d，其實都好擔心佢有事，
爸爸只係五十幾六十歲，
我怕佢睇唔到我結婚，抱唔到孫，
諗下諗下又想喊喇！

我不是做生意的材料

今日會睇舞台劇呀！

所以就穿得好靚咁諗住同男朋友仔拍拖拖去睇！

就係今次既舞台劇，出現左一段小插曲，
話說相關既舞台劇係以往幾年…銷售成績理想，
門票供不應求，所以之前賣門票都有所斬穫。

所以今年我都有買少量，諗住可以幫補下家計咁，
點知…巿道好似差左喎，都有人問下價既…不過冇咩人願意買喇！
唉！最衰個我自己又去唔到，試過諗住送俾人，竟然d朋友都冇人睇！
幾經辛苦，先轉讓俾朋友，
當中又發生係臨去前一日，個朋友又話臨時有事唔去得，
咁我都唔知點好，又唔會佢肯唔肯照俾錢，最後叫佢自己搵人去。(真係講錢就傷感情)
最後，係依盤所謂既"生意"上，帳面係有虧損既。(當然唔計用信用咭買野係有積分啦！)

最後，經過檢討，得出以下結論︰
1)由於門票由以往只限某指定信用咭換領而變到依家係人都可以係通利買，
真係一d都唔矜貴呀！由於唔係限量發售，所以咪唔馨香囉！
(即係下次要換d唔係人人買到既票啦！仲要數量唔多，冇人要都可以自己睇個d)
2)地點，由於演出地點好似變得越來越冇咁好，地方又大左，
供過於求(可能)，都唔知仲係咪場場爆滿！(依個我衰懶做資料搜集，哈哈！)
3)卡士…聽d人講，今年既卡士冇以往咁強勁，亦都係唔想睇既原因之一！
4)票價…由於今日買票既票價只屬中等…其實只需俾多幾十蚊就可以坐前d，你知啦！一向都係最好既野或者最cheap既先多人爭，中間野都唔搶手，所以入錯貨！

總括來講，今次係投資算係失利，不過好彩，經過禱告之後，事情又平安渡過！

---------------------------------------
後記︰
今次係我男朋友睇舞台劇(佢不嬲都唔睇依d貴野！)
希望今次齣劇生生性性，令佢覺得好睇啦！
如果唔係，下次可能唔陪我睇架喇！>3<

成就出書創作夢

昨天係counter見到既小冊子…

第二屆年輕作家創作比賽 - 成就出書創作夢

主題︰以城巿為題，寫實虛擬皆可
形式︰以文字為主，可以輔以圖像
資格︰35以下…從未以個人或獨立出版書籍人士。(即ck同渣老闆唔得)(鐵鎚可以一試喎！)\
文字︰中文，字數不限

初賽截止︰2008年12月20日

詳細唔講咁內，入以下網址自己睇…

網址︰www.shkpbookclub.com
電話︰25113248
電郵︰contact@shkpbookclub.com

------------------------------
曾幾何時，我都有諗過出書，但依家個腦好似閉塞晒咁！
可能年紀大左，冇細過個時感情咁豐富，咁多想像力！
我想講個d無聊野應該冇咩人想睇！

如果邊個有興趣，不妨參加丫！話唔定，有日出書個個係你！

清遠,番禺,中山三日二夜遊 (一)

10月10日 (五) 晴

由於心情太緊張既關係，睡得很差，一小時醒一次，
到早上五點幾已經起左身，
到七點鐘到，男友已經係我屋企樓下等我一起去冬菇亭食早餐喇！

吃完早點，就係火車站等巴士集合，
我地個團一行廿四人，當中有一對年長的夫婦一對父子，二個家庭(都係爸爸媽媽+一個小朋友)同埋一個一行12人既團隊。
同我地差唔多年紀去玩既就冇喇！
不過依個三日團，我諗真係冇咩旅行社成團！

第一日我地就坐車去到清遠，
係碼頭要跨過一架架船去海到食清遠雞餐，
一路食架船一路開，懶係叫有d風味啦！
我地個枱得八個人咋！
同行有二個家庭，一個爸媽連一個超好動的小男孩(6歲)，佢叫「BB」。
另一個家庭有爸媽連一個好怕羞既小女孩(4歲)，我地暫稱佢叫「妹妹」。
雖然大家一見面都三唔識七，雖然BB係靚仔一名，但係吸引我地注意既，係佢超好動，超攪笑既舉動！
首先講返餐飯先丫，好快就八餸一湯，白飯任裝，
由於BB爸爸唔鐘意飲個d湯，就買左支可樂同我地分享喇！
d餸大約有菜，2條魚，梅菜蒸肉，雞，蝦等等…
食飯期間…BB係咪同佢媽咪玩，又摸佢塊面，郁來郁去，佢媽咪唔睬佢拎轉個頭個時，
有一樣超爆笑既事情發生左，BB用手拎佢媽咪頭後面既髮髻，
我同男友係完全估唔到既情況下見到，即時大笑出聲，異口同聲︰「好百厭呀！」
講返個行程先，其實出海本來話會行個觀音寺，
但聽導遊講，由於個個係呃錢既寺廟，所以旅遊局依家唔準d團隊去個到，費時敗壞旅遊發展！
所以之後幾日，導遊會帶我地去食乳鴿補返數喎！

好快咁食完依餐就出發坐多幾個鐘去第二個行程，就係去左森波啦公園睇恐龍喇！
依個公園原來都係岩岩起左冇耐，所以有些機動遊戲都仲係整緊，冇得玩，
而個公園裡面其實有既活包括打高爾夫球，水上單車，恐龍世界，野人谷，紅葉園同2個迷宮！
咁我地首先去左睇一個唔係咁好睇既表演，
跟住就沿住條山路咁參觀一些野人既生活(包括釀酒，玩樂器，煮飯，織衫等等…)
行下行下我地就去到野人谷，導遊話只要我地扮野人叫，d野人就會知道我地驚而唔嚇我地，
點知成個山頭，我由開始至到尾，叫極都冇人理，d野人不單止冇停止嚇我地，仲變本加厲，
男友仲竟然話驚，嗚嗚…邊個保護我呀！
經過惶恐的一段路，終於去到恐龍世界，我地都影左d相留念。

之後就係是日最後一個行程…返溫泉酒店食飯同自由活動喇！

去到依間好鬼山卡啦既盤龍塔溫泉酒店，
個大堂都大喎！仲話係2008世界小姐既訓練基地添！
而間酒店有得浸溫泉之外，仲有得打桌球同table tennis，梗唔少得有個商場俾人買野啦！

註︰打英式桌球都好便宜，只係人民幣28蚊一個鐘咋，不過由於唔夠時間所以冇玩，
不過我地有行商場架，因為個商場只係得一個羽毛球場咁大咋！

好快咁我地就分好房間分別入房喇！
一入到房，就梗係沖涼啦！點解，本來怕國內天氣會凍d，
所以我就著左件oversize既長袖棉質裙去，
點知一路行一路流汗，熱到痴線，唔沖個涼點得呀！
之後我地就去食中式自助餐，
都係啦！野食話多唔多話少唔少，不過總結都有幾樣野叫唔錯既，
分別係馬拉糕，雞翼同炒蛋！

食完個晚餐我地就行左一陣，四圍影下相就返房喇！
返房做咩，又係我衰既…因為我地要睇"少年四大名捕"呀！
睇完先去浸溫泉！(所以咪冇時間玩桌球囉！)

較岩晒時間，我地就係溫泉區流連喇！
第一個游泳咁既地方叫小海豚唔知咩野，
男友一落水就猛咁話好熱好熱，有幾熱呀！同我冬天沖涼d水溫差唔多咋嘛！

下一站就係大浪池喇！一睇個名就知係玩大浪啦！
一開始，我同男友就諗住，應該唔會好大浪0者，不過都試下啦！
咁我地就唔會企得太深既水域，安全第一丫嘛！
玩下玩下，越玩越大浪，離岸最遠既地方d波浪好大，不過都只係浮下浮下咁，
相反，我地越近岸邊既湧左好多白頭浪過來，企係到既時候，d浪仲可能高個個人添呀！
心諗︰雖然我地企係到d水唔深，但企唔穩既話，其實都幾危險架！
我成日都企唔穩，我地向前彈一步，就俾d浪衝後三步，附近放浮床既位置更加似十號風球呀！
我地一路玩一路開心到嘻哈大笑，男友副眼鏡仲俾浪衝走，好彩手快捉返住咋！
我地諗︰如果一大班朋友一齊玩，一定更加開心呢！

玩到咁上下，我地就再走去玩其他野喇！
我地見到有個魚魚場，係個溫泉裡面有好多魚，個名太長又唔記得左喇！
個d魚魚專食人地身上既死皮，老泥！
d同池既人死都話自己身上冇死皮，係d魚傻傻地先吸佢地！
當我地坐係池既時候，d魚魚係咁鍚我地腳，真係好痕架！
我一痕就郁身去趕走d魚，有時嚇到男友身腳上d魚都走埋，
雖然係咁，話咁快d魚又會再咬你。(d魚冇牙架，不過呢！佢地會O晒咀咁吸走你d死皮！) d同池既人死都話自己身上冇死皮，係d魚傻傻地先吸佢地！哎！人點會冇死皮丫！真係丫！玩左一陣，男友終於頂唔順叫走喇！哈哈哈！

之後，我地再去浸既溫泉有
玫瑰花香池，咖啡池(好臭的)，米酒池，什麼日月池，瀑布池，石春浸腳池，按摩池，泡泡池，水晶池，熱石板，
數之不盡…不過我地每個都係浸左一陣就轉移陣地喇！

就係咁…玩完浸完返到房沖埋涼都成十二點幾，第二朝仲要七點半morning call，要快d休息喇！

p.s 就係個晚，我發惡夢呀！係個溫泉裡面，人d浸浸下變晒浮屍，有d仲七孔流血，都咪話唔恐怖！

森美小儀小孖俠

有冇人有興趣睇呀！話我知啦！
日期︰10月20日
地點︰九展
時間︰8時15分
價錢︰$300x2

如果搵唔到人，可能真係要送俾人睇，激死我喇！

抑鬱症

昨天早上睇頭條話如果夜晚訓唔到，成日紮醒，又晨咁早起身(比預定時間早)，
依d多數都係曾經患過抑鬱症既患者既病徵。

曾幾何時，我都好似患過下咁，
只不過未嚴重到去睇醫生，不過我個時已經好先知先覺咁去圖書館借書解毒，

只不過，應該好返架喇喎！
點解我仲成日都晨早起身呢？

(其實都只不過係七八點，定係身邊朋友個個晚起身顯起我早呢？呵呵呵！)

KELLY CONCERT 2008

重陽節…係屋企百無了賴既日子，
就係屋企睇左kelly既演唱會，

其實佢既concert我不嬲都鐘意，
因為靚人靚衫靚景，人又高又fit，跳舞又型！

今次有好幾個造型都好可愛又好靚女喎！
真係仲靚過結婚呀！

其實kelly依個女歌星，好似冇其他英皇星咁紅咁，
好彩佢屋企有錢，唔洗做埋d唔得光既事。

雖然kelly好靚女，但其實份人都幾粗魯架，哈哈哈！
不過佢勝在夠真，講野大大聲聲咁，絕無扮野！
咁樣，其實依一點都已經好少見喇！

係依個演唱會裡面，佢完成一個經歷，就要開始佢人生第二個經歷，
因為"佢要結婚喇！"
佢d歌迷喊到豬蹄咁…咁又係既…的確係好感人！
kelly係明星，明星都係人，結婚係好簡單又正常不過的事，
我都替佢高興呀！

恭喜晒呀！kelly，新婚愉快！