2007年10月30日星期二

信任

講開信任,尋日寫左篇有關對身邊人信任既文章。

有朋友send email同我講,話做女仔既唔信自己男朋友,首先唔該個男仔自己檢討下,點解自己會令到個女仔唔信佢先。如果唔係d男仔衰先,點會搞到大家冇左信任。想回返幾句。拿,我想澄清些少先,信任既問題,唔一定係個女既唔信個男架喎,倒轉個男既唔信自己個女朋友/老婆,其實我都一樣見唔少。

唔好以為我特登幫男仔講野喎…以下呢就純粹係個人體會:我覺得男女之間相處既循環,其實好脆弱,亦需要用兩個人同心協力,花好多心機去「呵護」呢一個良性循環。只要響循環既過程之中,是但一方稍有懷疑或者抱怨,成個循環就會被拖垮。

其實你可能會認為我咁諗係好白癡既,明明我既身邊人就係蠱蠱惑惑,點解我仲要無條件地去信任佢先?咁分明係自己蝕抵啦。係呀,係蝕架。對身邊人無條件既信任,係高風險既活動黎架,不過肉麻些少講丫,愛一個人查實都係高風險架啦,只不過我覺得,你揀得去愛佢,就徹底一d啦,你愛佢又唔肯信佢,咁你地之間既愛呢就永遠都有缺陷囉。

一個良性既循環呢,點都要有人start off至得,你如果計過數覺得由自己先去start呢個循環係唔抵,唔值得的話,咁你就不如索性唔好同呢個人一齊算鬼數啦。兩個人相處係一個互相付出同感動對方既過程,計較邊個岩邊個錯,下下要對方先做得好,然之後自己先選擇去信任對方的話,你既付出就變成有condition囉。咁with condition既愛呢就…仲有,同伴侶相處,凡事都「追究責任」,有咩意思呢?放開d啦,朋友。

抄錄自 <>的博客內

1 則留言: