管理身邊人

認識有對結婚冇耐既夫婦，老婆對老公既一舉一動總係事事猜疑。事無大小硬係疑神疑鬼，形住個老公響出面沾花惹草。佢老公同我都算幾熟既，呢個男仔雖未至於乖到擔屎都唔偷食果隻，不過響我眼中，呢個男仔查實都算係幾好仔架啦。你同我講話佢真係走左去滾的話，老實講，都幾難要我相信。直至有一日佢同我講：「CK，我真係頂唔順啦。我明明冇去滾佢都硬係唔信，一有女仔同我講多兩句佢就屈我同人有路，與其係咪都俾人屈我響出面沾花惹草，我倒不如真係出去滾鑊勁既，起碼咁都抵d…」我都唔知點答佢好。佢老婆我都識既，唔通要我同佢講：「係呀，你去滾返鑊勁架啦，咁樣先抵？」我成日都讚我老婆聰明。其中一樣我覺得佢最聰明既地方，係佢好懂得信任自己既身邊人。
做生意偶然少不免都要溜漣一d煙花之地，冇誘惑就假既。只不過，老婆對自己既無條件信任，往往係成為誘惑當前既最佳金剛箍。抵禦誘惑除左靠意志之外，身邊人對自己既信任，促使你唔想辜負老婆對自己既付出，先至係最佳既防禦武器。都係果句啦，兩個人相處，係一個生生不息既循環。至於個循環係良性還是惡性，就睇下大家識唔識諗啦。又，假如你覺得，你身邊既人，係會「利用」你對佢既絕對信任去放肆越軌，因而令你唔肯將自在既百份百信任交俾佢的話…我諗，你真係要諗下係咪可以真係同佢過人世啦。

*****遇到悲哀休誇張早幾日朋友飯局，一班人響度嘻嘻哈哈，席間大家講起生BB既問題，笑到不亦樂乎。飯局結束之後，朋友靜雞雞同我講，大半年前，佢太太有左BB，不過最後miscarriage收場。我聽完，心裡一沉。一來暗怪自己剛才響度嘻嘻哈哈口水橫飛咁講生BB，二來，覺得人越大，真係會越黎越多考驗降臨響大家既身上。早幾年我屋企都發生過d唔係幾開心既事，而呢d唔多開心既事亦一直有手尾跟。當自己遇到呢d挫折呀，唔愉快既事既時候，總係會覺得，自己遇上既問題好似天咁大，身邊周圍既人，唉，唔明架啦，佢地個個都冇自己咁唔好彩，彷佛自己就成為「不幸之王」。同朋友聚舊，好多時都會俾我聽到一d發生響舊朋友身上既不幸事情。或者大家都長大啦，提返起自己各自曾經發生過既不幸時，態度都總係輕描淡寫。當然，事情過去啦，講返件事出黎當然輕鬆，不過當不幸降臨既一刻，我響度諗，大家當時其實係點樣捱過去既呢？畢竟，大家都長大，經過歲月磨練之後，大家都再唔係好似以前讀書時代咁脆弱。發生響朋友身上既不幸，提醒左我，當我萬一再遇上d咩大挫折既時候，唔好以為自己係世界既中心，世界上最唔好彩既人。事實係，同你一齊去面對挫折同不幸既，仲有好多好多人，甚至包括一班響你身邊既老朋友。唔好彩既，一定唔止你一個。遇上悲哀，千祈唔好自我放大。

抄錄自 <>的博客內