擔心

幾年前，我爸爸證實患上鼻咽癌，
得悉的數天內，他由一個吸煙的人馬上一根也不抽，
甚至即時結束公司既業務退休。(個時佢經營既排檔發生左一d事，損失)

幾過幾年既休養，
爸爸依家既退休生活都幾如意呀！
玩下股票(唔識玩又學人玩)，做下家務，學下按摩，
唔…

今天早上收到個消息，就係爸爸係覆診後，
醫生話佢既病情有機會復發，
媽咪叫我地唔好激佢。

當然，第一時間我梗係覺得自己冇激佢啦！

其實生老病死乃人之常情，
可能，就咁望落冇病冇痛既我，會比佢先行一步呢？
話唔埋，不過你話我唔擔心就係假，
但係除左陪佢多d，又或者俾佢見多d，其實我都冇咩可以做…

不過我知我係咁多個女之中最令佢擔心既一個。(仲要係大女添！)
我都知我冇用架喇！

回想起細個時同爸爸既點滴，都好值得懷念，
雖然大個女之後冇咁痴家，而最令佢生氣的都只係我。
可能異性相吸，反而我同爸爸既感情好過同媽咪(可能媽咪錫d妹多d)
諗下諗下都好感慨！

諗多d，其實都好擔心佢有事，
爸爸只係五十幾六十歲，
我怕佢睇唔到我結婚，抱唔到孫，
諗下諗下又想喊喇！

我不是做生意的材料

今日會睇舞台劇呀！

所以就穿得好靚咁諗住同男朋友仔拍拖拖去睇！

就係今次既舞台劇，出現左一段小插曲，
話說相關既舞台劇係以往幾年…銷售成績理想，
門票供不應求，所以之前賣門票都有所斬穫。

所以今年我都有買少量，諗住可以幫補下家計咁，
點知…巿道好似差左喎，都有人問下價既…不過冇咩人願意買喇！
唉！最衰個我自己又去唔到，試過諗住送俾人，竟然d朋友都冇人睇！
幾經辛苦，先轉讓俾朋友，
當中又發生係臨去前一日，個朋友又話臨時有事唔去得，
咁我都唔知點好，又唔會佢肯唔肯照俾錢，最後叫佢自己搵人去。(真係講錢就傷感情)
最後，係依盤所謂既"生意"上，帳面係有虧損既。(當然唔計用信用咭買野係有積分啦！)

最後，經過檢討，得出以下結論︰
1)由於門票由以往只限某指定信用咭換領而變到依家係人都可以係通利買，
真係一d都唔矜貴呀！由於唔係限量發售，所以咪唔馨香囉！
(即係下次要換d唔係人人買到既票啦！仲要數量唔多，冇人要都可以自己睇個d)
2)地點，由於演出地點好似變得越來越冇咁好，地方又大左，
供過於求(可能)，都唔知仲係咪場場爆滿！(依個我衰懶做資料搜集，哈哈！)
3)卡士…聽d人講，今年既卡士冇以往咁強勁，亦都係唔想睇既原因之一！
4)票價…由於今日買票既票價只屬中等…其實只需俾多幾十蚊就可以坐前d，你知啦！一向都係最好既野或者最cheap既先多人爭，中間野都唔搶手，所以入錯貨！

總括來講，今次係投資算係失利，不過好彩，經過禱告之後，事情又平安渡過！

---------------------------------------
後記︰
今次係我男朋友睇舞台劇(佢不嬲都唔睇依d貴野！)
希望今次齣劇生生性性，令佢覺得好睇啦！
如果唔係，下次可能唔陪我睇架喇！>3<

成就出書創作夢

昨天係counter見到既小冊子…

第二屆年輕作家創作比賽 - 成就出書創作夢

主題︰以城巿為題，寫實虛擬皆可
形式︰以文字為主，可以輔以圖像
資格︰35以下…從未以個人或獨立出版書籍人士。(即ck同渣老闆唔得)(鐵鎚可以一試喎！)\
文字︰中文，字數不限

初賽截止︰2008年12月20日

詳細唔講咁內，入以下網址自己睇…

網址︰www.shkpbookclub.com
電話︰25113248
電郵︰contact@shkpbookclub.com

------------------------------
曾幾何時，我都有諗過出書，但依家個腦好似閉塞晒咁！
可能年紀大左，冇細過個時感情咁豐富，咁多想像力！
我想講個d無聊野應該冇咩人想睇！

如果邊個有興趣，不妨參加丫！話唔定，有日出書個個係你！

清遠,番禺,中山三日二夜遊 (一)

10月10日 (五) 晴

由於心情太緊張既關係，睡得很差，一小時醒一次，
到早上五點幾已經起左身，
到七點鐘到，男友已經係我屋企樓下等我一起去冬菇亭食早餐喇！

吃完早點，就係火車站等巴士集合，
我地個團一行廿四人，當中有一對年長的夫婦一對父子，二個家庭(都係爸爸媽媽+一個小朋友)同埋一個一行12人既團隊。
同我地差唔多年紀去玩既就冇喇！
不過依個三日團，我諗真係冇咩旅行社成團！

第一日我地就坐車去到清遠，
係碼頭要跨過一架架船去海到食清遠雞餐，
一路食架船一路開，懶係叫有d風味啦！
我地個枱得八個人咋！
同行有二個家庭，一個爸媽連一個超好動的小男孩(6歲)，佢叫「BB」。
另一個家庭有爸媽連一個好怕羞既小女孩(4歲)，我地暫稱佢叫「妹妹」。
雖然大家一見面都三唔識七，雖然BB係靚仔一名，但係吸引我地注意既，係佢超好動，超攪笑既舉動！
首先講返餐飯先丫，好快就八餸一湯，白飯任裝，
由於BB爸爸唔鐘意飲個d湯，就買左支可樂同我地分享喇！
d餸大約有菜，2條魚，梅菜蒸肉，雞，蝦等等…
食飯期間…BB係咪同佢媽咪玩，又摸佢塊面，郁來郁去，佢媽咪唔睬佢拎轉個頭個時，
有一樣超爆笑既事情發生左，BB用手拎佢媽咪頭後面既髮髻，
我同男友係完全估唔到既情況下見到，即時大笑出聲，異口同聲︰「好百厭呀！」
講返個行程先，其實出海本來話會行個觀音寺，
但聽導遊講，由於個個係呃錢既寺廟，所以旅遊局依家唔準d團隊去個到，費時敗壞旅遊發展！
所以之後幾日，導遊會帶我地去食乳鴿補返數喎！

好快咁食完依餐就出發坐多幾個鐘去第二個行程，就係去左森波啦公園睇恐龍喇！
依個公園原來都係岩岩起左冇耐，所以有些機動遊戲都仲係整緊，冇得玩，
而個公園裡面其實有既活包括打高爾夫球，水上單車，恐龍世界，野人谷，紅葉園同2個迷宮！
咁我地首先去左睇一個唔係咁好睇既表演，
跟住就沿住條山路咁參觀一些野人既生活(包括釀酒，玩樂器，煮飯，織衫等等…)
行下行下我地就去到野人谷，導遊話只要我地扮野人叫，d野人就會知道我地驚而唔嚇我地，
點知成個山頭，我由開始至到尾，叫極都冇人理，d野人不單止冇停止嚇我地，仲變本加厲，
男友仲竟然話驚，嗚嗚…邊個保護我呀！
經過惶恐的一段路，終於去到恐龍世界，我地都影左d相留念。

之後就係是日最後一個行程…返溫泉酒店食飯同自由活動喇！

去到依間好鬼山卡啦既盤龍塔溫泉酒店，
個大堂都大喎！仲話係2008世界小姐既訓練基地添！
而間酒店有得浸溫泉之外，仲有得打桌球同table tennis，梗唔少得有個商場俾人買野啦！

註︰打英式桌球都好便宜，只係人民幣28蚊一個鐘咋，不過由於唔夠時間所以冇玩，
不過我地有行商場架，因為個商場只係得一個羽毛球場咁大咋！

好快咁我地就分好房間分別入房喇！
一入到房，就梗係沖涼啦！點解，本來怕國內天氣會凍d，
所以我就著左件oversize既長袖棉質裙去，
點知一路行一路流汗，熱到痴線，唔沖個涼點得呀！
之後我地就去食中式自助餐，
都係啦！野食話多唔多話少唔少，不過總結都有幾樣野叫唔錯既，
分別係馬拉糕，雞翼同炒蛋！

食完個晚餐我地就行左一陣，四圍影下相就返房喇！
返房做咩，又係我衰既…因為我地要睇"少年四大名捕"呀！
睇完先去浸溫泉！(所以咪冇時間玩桌球囉！)

較岩晒時間，我地就係溫泉區流連喇！
第一個游泳咁既地方叫小海豚唔知咩野，
男友一落水就猛咁話好熱好熱，有幾熱呀！同我冬天沖涼d水溫差唔多咋嘛！

下一站就係大浪池喇！一睇個名就知係玩大浪啦！
一開始，我同男友就諗住，應該唔會好大浪0者，不過都試下啦！
咁我地就唔會企得太深既水域，安全第一丫嘛！
玩下玩下，越玩越大浪，離岸最遠既地方d波浪好大，不過都只係浮下浮下咁，
相反，我地越近岸邊既湧左好多白頭浪過來，企係到既時候，d浪仲可能高個個人添呀！
心諗︰雖然我地企係到d水唔深，但企唔穩既話，其實都幾危險架！
我成日都企唔穩，我地向前彈一步，就俾d浪衝後三步，附近放浮床既位置更加似十號風球呀！
我地一路玩一路開心到嘻哈大笑，男友副眼鏡仲俾浪衝走，好彩手快捉返住咋！
我地諗︰如果一大班朋友一齊玩，一定更加開心呢！

玩到咁上下，我地就再走去玩其他野喇！
我地見到有個魚魚場，係個溫泉裡面有好多魚，個名太長又唔記得左喇！
個d魚魚專食人地身上既死皮，老泥！
d同池既人死都話自己身上冇死皮，係d魚傻傻地先吸佢地！
當我地坐係池既時候，d魚魚係咁鍚我地腳，真係好痕架！
我一痕就郁身去趕走d魚，有時嚇到男友身腳上d魚都走埋，
雖然係咁，話咁快d魚又會再咬你。(d魚冇牙架，不過呢！佢地會O晒咀咁吸走你d死皮！) d同池既人死都話自己身上冇死皮，係d魚傻傻地先吸佢地！哎！人點會冇死皮丫！真係丫！玩左一陣，男友終於頂唔順叫走喇！哈哈哈！

之後，我地再去浸既溫泉有
玫瑰花香池，咖啡池(好臭的)，米酒池，什麼日月池，瀑布池，石春浸腳池，按摩池，泡泡池，水晶池，熱石板，
數之不盡…不過我地每個都係浸左一陣就轉移陣地喇！

就係咁…玩完浸完返到房沖埋涼都成十二點幾，第二朝仲要七點半morning call，要快d休息喇！

p.s 就係個晚，我發惡夢呀！係個溫泉裡面，人d浸浸下變晒浮屍，有d仲七孔流血，都咪話唔恐怖！

森美小儀小孖俠

有冇人有興趣睇呀！話我知啦！
日期︰10月20日
地點︰九展
時間︰8時15分
價錢︰$300x2

如果搵唔到人，可能真係要送俾人睇，激死我喇！

抑鬱症

昨天早上睇頭條話如果夜晚訓唔到，成日紮醒，又晨咁早起身(比預定時間早)，
依d多數都係曾經患過抑鬱症既患者既病徵。

曾幾何時，我都好似患過下咁，
只不過未嚴重到去睇醫生，不過我個時已經好先知先覺咁去圖書館借書解毒，

只不過，應該好返架喇喎！
點解我仲成日都晨早起身呢？

(其實都只不過係七八點，定係身邊朋友個個晚起身顯起我早呢？呵呵呵！)

KELLY CONCERT 2008

重陽節…係屋企百無了賴既日子，
就係屋企睇左kelly既演唱會，

其實佢既concert我不嬲都鐘意，
因為靚人靚衫靚景，人又高又fit，跳舞又型！

今次有好幾個造型都好可愛又好靚女喎！
真係仲靚過結婚呀！

其實kelly依個女歌星，好似冇其他英皇星咁紅咁，
好彩佢屋企有錢，唔洗做埋d唔得光既事。

雖然kelly好靚女，但其實份人都幾粗魯架，哈哈哈！
不過佢勝在夠真，講野大大聲聲咁，絕無扮野！
咁樣，其實依一點都已經好少見喇！

係依個演唱會裡面，佢完成一個經歷，就要開始佢人生第二個經歷，
因為"佢要結婚喇！"
佢d歌迷喊到豬蹄咁…咁又係既…的確係好感人！
kelly係明星，明星都係人，結婚係好簡單又正常不過的事，
我都替佢高興呀！

恭喜晒呀！kelly，新婚愉快！

上海小點 ichiban

是次上海點心製作班 係由舊公司 和記贊助既，哈哈哈！

我地既學員有阿Pat, Amelia, 輝輝, 阿欣同我…
其實整個課程，大部分時間都係睇下師傅整，
我地只不過負責搓下粉，包下餡，同煎炸下…

依個課程有2堂，第一堂係整小籠包同豆沙鍋餅，
第一次包個小籠包，都算係咁啦！但就整唔到出面個d樣喇！
反而個豆沙鍋餅就係真幾香，同出面個d差唔多添呀！正！
(咁以上二款小食都奉獻左俾為食男友！)

第二堂係整蔥油餅同芝麻奶油流砂煎堆，
賣相都相當靚仔，今次整就好似易d喎！哈哈哈！
咁個蔥油餅蒸完冇炸呀！諗住清清地第二朝返工做早餐，
至於個芝麻奶油流砂煎堆，每人三粒我就醒左二粒俾男友，
d煎堆係特別製造架！點解，因為係特別大粒同特別多芝麻，
真係一眼就認得出呀！鬼咩！有人係芝麻愛好者嘛！

話咁快就完左二堂，唔…其實整野食都真係幾麻煩，
又要度依樣量個樣，少d器材都唔就手，
令我嚴重減低學整野食既衝動…灰…灰…灰！

雷曼兄弟 之 外篇

依家先講雷曼兄弟依單新聞，係就係out左d，
不過唔好怪我…因為我不嬲都後知後覺…

其實雷曼兄弟發生咩事，講真我都唔係咁清楚，
佢既影響除左話令人冇左份工，aig同aia可能執笠(唔知係咪架)，
同好多人冇左一大副身家之外，其實我都仲未知發生咩事！
(如果有好心人係咁而同我簡單咁解釋下就好喇！)

話說今朝睇報紙話有d巿民向政府申訴話俾銀行誤導，
要求政府幫佢地出頭，
其中一d巿民既金額更去到成千萬，
雖然我都替佢地有咁多財產感到開心，
但係如果真係佢地買左債券而又出左問題要搵政府打救，
我突然又恨一恨心喇！
係…洩晒d錢係好慘，不過我唔識野都知道d債券好似係一有問題可能變廢紙個d，
同埋點都有風險，
如果銀行講唔清楚係唔岩，但之不過人地點可能每一個細節都講得清楚。
今次咁樣，真係好唔好彩！

如果輸錢就要人政府幫手叫賠償，贏左又唔會同人講，
依d係咪叫輸打贏要，係咪衰呢？

千其唔好話我自私，我都損失慘重架！
我冇錢投資，但我d強積金相信都好快冇晒！
唉...其實識唔識為自己打算，咪又係咁，咪又係冇晒d錢！><
我真係情願放係床下面個餅乾罐算！

安全感 vs 自重感 (上)

何謂安全感？

無論男女老少，其實都需要安全感，
安全感可分在外在提供及自給的，
外在提供︰父母、伴侶、同學、兄弟姊妹、朋友、同事等等

同一些信賴的人和熟悉的環境，因為有了一定既感情同關係，人總會感到安全，
有了安全感，即使在陌生的環境或遇上變化時，都比較能從容咁面對，較少表現出受壓迫及焦慮不安的徵狀。
有了安全感的人，其實也會表現得比較自信，有人支持喎，咩都勇d啦！
所以，無論男女，有安全感既人都會不自覺的散發一種耀眼既光芒。
依d就係所謂既charming喇！

如果冇安全感又點呀！
哈！咁就大穫喇！缺乏安全感的人都怕同人有身體和眼神接觸，
對人猜疑，唔信任同唔想同人建立親密關係；佢地害怕付出感情，甚至過度的恐懼，
其實好多時，他們的恐懼仲無聊到爆。
佢地怕接觸新事物和新經驗，並會感到不安和畏縮，害怕面對困難的事和人。
在日常生活中，容易表現受壓迫和焦慮不安的徵狀(例如：無緣無故哭泣、咬指甲、抖顫等)，
佢地唔知可以信邊個，但可能係佢知但又唔選擇相信。
點解咁？咪因為自卑囉！佢地甚至會利用挑戰權威的方式來掩蓋他們的自卑心態，即係駁人注意啦！

所以咪咁多男男女女感情上，做埋d無謂既小動作引對方注意囉！
其實，安全感除左靠外在，唔係應該自已俾自己咩！
一個人如果連自己都信唔過自己，對自己冇信心，人地又點會對你有信心呢？

所以…安全感，唔可以只要求別人俾你，應該自己俾自己。
不過咁…安全感對於人與人之間，係一層好深既橋樑，人畢竟…要與人生活嘛！


至於 自重感 就下回分解吧！

熱戀期 vs 老夫老妻

我想…任何談過戀愛的人也經歷過熱戀期…
然而，熱戀期的長短卻因人而異，人人不同。

熱戀期時大多情侶也是如膠似漆的黏在一起，
當熱戀期間，大家多會望見對方的優點，
過了一段時間，情侶便會進入穩定期，
行街，吃飯，看戲好像重覆又重覆似的。
開始因穩定下來的關係，
對方好像因穩定而欠缺當初追求時的心思，
感覺變得缺乏浪漫與新鮮感，
並有種感情變淡的失落感。

雖然有些人喜歡的愛情是簡簡單單，
但是愛情是需要雙方共同經營與維繫的。
雖然理論上是叫人不要計較誰付出多少，
但單方面的付出多或少總會帶來不健康的感情。

即使雙方進入穩定期後，
請男生還是得花一些心思來製造浪漫或驚喜，
畢竟女生在這方面總是有所期待及渴求！
然而雙方亦是保持溝通…是心靈上的溝通及了解對方需要。

此外，男生可會對於未來有所規劃與安排，
都會令女生也比較能感到安心與信任。
當然，這方面要雙方一起討論更公平。

熱戀期過後，大家開始各自各地自行回歸現實，
再各自各忙碌，減少先前熱戀期騰空出來時間。
以為熱戀期且感情相對穩定之後，必定像吃了定心丸似的，
自以為不怕對方會跑掉。
或許在感情轉淡後，就開始會以忙碌做為藉口掉以輕心，
其實這個時候是否更應彼此體諒與包容，並給予對方空間，
這樣一來也許不像之前常常能夠在一起，
但反而會更珍惜相處的每一分每一秒。不是嗎？

老夫老妻，固明思異，就係感情穩定的老夫婦，
咁係咪相處時間耐，一起耐，感情必定好呢？

我又覺未必？以下係一篇很好旳文章…

什麼是老夫老妻的愛07Mar07

愛，就是一個睡在病床，一個坐在側旁，兩隻不同的手緊扣在一起，其中一個為另一個流下淚來。
愛，就是其中一個為另一個在醫院的草地推著輪椅，或許坐在輪椅的一個早已因中風而不能言語，但另一個卻為他或她，說起往日開心快樂的事。
愛，就是當其中一個已經老眼昏花，另一個仍為他／她引路。
愛，就是兩老在門診室候診的時候，仍能拿起手提電話，互相把玩對方電話的聆聲，然後大笑一番。
愛，就是當其中一個已經癱瘓在床多年，另一半還不持勞苦，無怨無悔為對方護理大小二便。
愛，就是當其中一個彌留之際，另一個執著將逝者漸變冰冷的手說：我愛你。
愛是甚麼？這答案，不在那些暢銷年青愛情小說，而在貧民區醫院的老人科病房…

~ 肥醫生@西九龍貧民區

我想…老夫老妻就是大家經歷過，互相扶持，包容和忍諒的過漫長的人生。

中秋正日

中秋正日，男友回家眠左一陣就到我家中做節喇！
係2男6女既情況下，希望佢唔好嚇親！亦希望佢喜歡不同既美食！
(有焗雞亦，蒸墨魚丸，鮑魚白菜仔，芝士焗熗魚，干瑤柱蒸水蛋，茄汁炒大蝦，佢斬料加既燒鴨)
而好攪笑咁…佢被安排幫手整湯圓添，都唔知佢咁大個仔有冇試過，哈哈哈！

我希望…係來緊既每一年，佢都能夠出席我家中既團年！
(其實你睇下其他妹既男朋友，你就知道你其實真係好幸福架喇！呵呵呵！)

意義重大的中秋節

今年既中秋，係我同男友同埋識左朋友欣既第一個中秋，
今個節日又冇咩function攪，我又唔可以係男友家中食飯…
就係咁…好多謝朋友欣邀請我地參與佢同佢同學既中秋party~

因為朋友欣同男友都要返工既關係，所以我地就係放工之後先出發！
今次我地去既目的地既近大嶼山既塘福！
去到東涌再轉架11號巴士，又上山又落山，真係勁頭暈！

好快咁，我地落車，行一段路仔就搵到佢地間屋，佢地準備緊燒野食添！
就係燒燒下野食既時間…有人唱生日歌！
原來係慶祝係9月17日生日既朋友欣，依個傻妹仲唔知咩事，唔記得自己生日哩！
不過我都唔係好佢好多，身為佢好朋友既我都唔記得！真係丫…
不過我都覺得好幸運，有份出席佢既生日party，真係好榮幸呀！
朋友欣收到一份佢想要好耐既禮物同神秘禮品，而我，就只係送左d營光棒俾佢咋！哈哈哈！

玩到咁上下，我地一班人又行去沙灘喇！
最開心係成班人，每人手掛住螢光圈，大家係到玩數字球，
在黑漆漆既沙灘裡面，有大片既幼沙上高，每人都跑都唔同地方，跟住又跑返去接一個螢光波，
其實真係好靚架！成班人係到嘻嘻哈哈，叫一個唔會有人應既數字，你話幾刺激！
而且，有時未接到都大叫接到，叫左停d人又係到借d易行多2步，勁攪笑！

之後就係玩火既時間，大家都玩左d集體game，
其實依d咁既時間…玩true & death係幾刺激，不過要好fd好fd同埋玩得起先得…
而講鬼估係禁忌…所以唔俾講，哈哈哈！
之後大家就分批咁行下玩下坐下咁！

大概約3點幾就回程咁排隊沖涼，
朋友欣同成班朋友就係到玩"u佬"，嘻哈大笑鬼咁大聲，
真係訓著都聽到呀！攪到男友都話︰"原來'u佬'真好好玩，可能有其他玩法，真係可以玩到好開心架！"
就係咁…我地就去了解事實既真相！

原來，玩法就同一般既玩法冇分別，唔同既係，一定要有一個叫朋友欣既人物，
佢d大頭蝦又蝦碌既對白，真係笑到你傻呀！
依個傻妹，真係開心快樂既泉源！

話咁快，就回程喇！係依到，好多謝朋友欣既邀請同佢朋友同我地歡度依個中秋節！多謝！

善用員工福利

話說返工咁耐就病…
一直冇好轉過…仲要不停咁聽電話同見客…真係丫！

傷風病患愈見嚴重，又咳又多鼻涕，攪到晚晚都要訓到一半起身呻鼻！
又唔係咁透到氣，攪到餐餐超清淡，仲要抵抗力弱生埋唇瘡，
超黑仔，又樣衰！

係昨天，終於頂唔順，拿拿臨取回員工證去睇醫生，順便預約埋物理治療睇返上次跳水整傷既腰骨！
公司福利…一年可以睇50次醫生！
咁樣，返工唔夠第一個星期，我已經善用公司福利喇！

沒有絕對的對與錯

岩岩睇新聞話…早前大火中死去的二位消防員死因。

部分內容話雖然氧氣未必夠但仍堅持救人，上到頂層還陪伴受困的人，
佢地既行為很英雄，亦都好有仁慈之心…

不過，我岩岩係到諗…

如果大太火又唔夠氧氣既時候，我深知自己有一家大細，上有高堂，下有妻兒，
如果我決定為安全起計而離場，最後頂層既人因我冇去救而燒死。
咁高層會怪罪於我嗎？報紙巿民會怪我忍心嘛！死者家人會怪我見死不救嘛！

這個決定，如何分對錯，
這個決定，代表我自私嗎？