泰國生日之旅

2008/4/19 下午 3號風球
放了半年假，男友到公司接放工，陪我執行李，不過，打風呀！好驚行程受到影響！

2008/4/20 04:30
半夜起身，男友起身陪我食早餐跟住諗住送我去機場，點知巿中心間m記冇開，我唔制呀！
好彩，最後他都搵左間24小時m記俾我，我可以食個熱香餅早餐了！真開心！
之後，他車我坐巴士到機場！

2008/4/20 18:20
天呀！搵到友人準備check in手續，哎呀！因為昨天打風，所以班機要delay呀，等埋angel，四人一起飲茶！
其實個個之前幾日都訓得唔好，勁樣衰，哈哈哈！

2008/4/20 下午
到達泰國了，先send 個sms俾男友報平安先，
搵到間酒店…間酒店幾靚又方便喎，最緊要係平丫嘛！good~~~(你地想知都可以問我架)
好喇！2點幾喇，快d去翟道翟shopping啦！去到，痴左線，熱到傻左，著左背心同短褲都可以流晒汗(好彩係酒店做足防晒措施)，
我呢…就勁shopping，最後，不消2句鐘，我已經洗左一半既錢喇！勁驚！
買左d咩呢…包括3個袋，一d煮食用既材料，手信仔，頸鍊，介指同耳環！

2008/4/20 晚上
去了shopping ctr，食了一餐唔太好食既晚餐，個到d侍應呢…見你舉手第一時間調轉頭，勁！
吃完飯後，去左big c買零食，之後回酒店後跟好友同一間房，張床好大呀！
我地二個左碌右碌，都碌唔到對方個面，勁攪笑！

2008/4/21早上
吃過早餐，今天既行程係行商場，哈！好彩…有冷氣嘆！
就係食完早餐冇幾耐，我地又去食芒果布甸同芒果糯米飯，真係好好味架！
緊接著shopping again，食左個好味既冬陰公麵(痴左線，4個人食左3碟餸，4碗麵)，跟住我又要買下boots既平護膚品等手信…

2008/4/21 中午
係泰國既商場，如果多名店既…其實買野都唔係話平，
買件衫依然最少三四百蚊，不過呢…買內衣又真係幾抵既，
話說好友今次既行程主要既目的…係買內衣至真…
我地二個一連掃左廿幾個入去試…一路試一路各自俾意見…試左成個幾鐘，最後梗係收穫甚豐啦(仲要件件皆索，問你死未)！
不過我諗依d咁性感又開放既shopping方式，真係唔得人人得…我就試到啦！係咪好羨慕呢…呵呵呵！
我地仲有見到d得意首飾，雖然唔係話好平，但勝在款式可愛，香港唔見有嘛，
不過惡習又出現喇，唔理三七廿一，買左先算…

2008/4/21 黃昏
我地一行四人去左一間高級餐廳飲野，又話要有dress code，又要著高跟鞋(突登帶對高跟鞋去泰國)，
不過呢…個夜景真係靚，53/f食飯個到仲好有情調同氣氛，仲有live band，超浪漫，
好多謝好友為我花咁多心思。飲完野，我地去左夜巿一間餐廳(又係唔知叫咩名，不過味道還不錯)
依個夜巿呢…好行好多，我仲買左條裙添呀，依類款我係香港行左好耐都冇岩心水，普通d都要$4-500，依家百幾蚊就可以有，真係超開心！
只可惜，我地得一個鐘頭行咋，買得好少野呀！不過…都好既，咁樣我咪又可以節省少少囉！哈哈哈！
好友最開心，佢買左好幾隻jess既cd呀！

2008/4/22 零時
其實個晚12點幾，我收到男友既sms，不過對唔住丫，我仲未返到酒店，要你咁夜等我，辛苦晒！
都返到酒店喇…點解咁耐都冇電話響既…攪到我涼又唔敢沖，
差唔多半小時後，電話終於響喇！我第一時間諗住跑去聽下，點知聽到個消息，勁down囉！
係咩消息？咪就係好友話︰"唔好意思，個電話唔係搵你，係搵我架！"
冇理由喎！點會咁架，不過佢堅定既眼神同語氣，仲要一拿起聽筒個d恩愛對話，真係激死我呀！
到最後，都係決定沖涼既時候，到我有電話喇！
你同我講︰話打左好耐都唔通，
鬼咩，人地煲緊粥呀！好彩係你打算放棄之際，都成功駁到電話，好開心，就係咁，即使我地分隔兩地，都可以好開心咁傾電話！

2008/4/22 早上
吃過早餐後，我們去做spa喇，友人做泰式按摩，我同好友就做body磨沙同推拿，
well，感覺普通啦！我仲以為會好浸係好多花瓣既浴江個d添，哈哈哈！
不過由於係最後一日，行程十分緊密，我地連下午飯都冇食，又趕去shopping ctr到買袋同shopping喇！
最後，女孩們都買到accessories，我丫，咩都冇呀！見到隻手鈪唔錯既！不過呢…又冇話唔買唔得喎，都係省返d先！
之後睇中既戒指，好想買架，點知又冇貨，可惜！

2008/4/22 下午
友人會逗留多一天，所以我同好友會先行返香港，
其實，我很高興跟她一起去玩，老實說，今次旅程是好友送給我的生日禮物，
基本上，我除了帶個人去同買野shopping，一切大小事務，我咩都唔知亦可以唔理，
佢仲要同我講好開心可以識到我依個好朋友，其實我都係，不過我唔識表達，衰衰咁！

2008/4/22 晚上
係飛機上，超爆攪笑野又發生喇！
我同好友一起問人攞啤牌，
由於我地各自係香港都有一個勁期待見面既人會係機場等緊我地，
我地其實係超興奮，但見個樣實在太殘喇！
白痴的姊妹花，係飛機上，仲要最前排，敷mask(唉！仲要撞正派餐添)
連d空中小姐少爺都笑我地喇！醜死怪！
冇計喇！一陣要見人，唔打扮下點得架…
就係咁，我地二個人又開開心心過左依二個半小時既機上旅程，
我地第一時間跑去過關等攞行李，好衰唔衰，我地太早check in，
d行李鬼咁遲d出，等死我地喇！
就係終於攞到行李既時候，我地每人一架手推車，互相檢查大家個樣係咪見得人既，終於出閘喇！

跟住係點呢…下回分解吧！

續