囍宴

昨天收到上頭指示，今晚要去尖咀飲，當作家庭聚餐…
其實都好似好樣衰咁，皆因新郎新娘我都唔識，無啦啦做咩去呢？唔通真係為左食一餐咁厚面皮？

好彩，依個謎團係到場終於解開喇！
原來，係親戚-十一嬸婆個仔結婚，真係要恭喜晒！(但我一次都未見過依d親戚)

係成個宴會上，一般程序都好老土咁進行，
新娘都係感動到喊到七彩，正確來說，係感動！結婚喎…梗係感動啦！絕對值得高興！
而司儀呢…唔…依排d人都好興攪爛gag…
今晚個新娘好靚女，新郎又忠直，望落去仲好老實，幾好幾好！good match！

丫，不過有一樣野令我好驚喜既就係，食飯前影既合照，竟然可以係臨完既時候可以即場派發俾大家，咁又幾好喎！效率高，唔洗n年後又再約出來攞相，估唔到咁快手！勁！

作為同場既賓客，我同妹妹們坐在一起，一起討論二妹結婚時，我地點攪呢？
係咪要搵邊d騎呢得來新娘攪笑但自己可愛既童年合照呢？
細妹話要做司機負責攪gag，我諗，我地係時候要偷拍二妹平時鬧男朋友既片段，等第時播返俾佢地睇，等佢地o晒咀先得！
不過呢…有d阿叔親戚都好煩，我跟妹妹討論緊邊d賓客唔好請，邊d賓客唔想請(因為太麻煩又諸多要求)，結論係…成個家族都唔洗請喇！哈哈哈！

最後在此祝賀一對新人，白頭到老，永結同心！

(其實八卦既我真係好鐘意人地結婚，因為好幸福架，見到人地感動都已經好開心喇！好彩今晚因為唔熟，所以冇喊，唔係就失禮人)